УВЕР ЙОГЫН

ОСАГО-м – электрон йӧн дене

Тений талук тӱҥалтыш гычак 18 ийым темыше кажне водитель страховой компанийын сайтыштыже ОСАГО-м да электронный полисым налын кертеш. Тидлан личный кабинетыште регистрироватлалтман, тушан  шкендан данныйдам кодыман да заказлан тӱлыман. Вара ОСАГО-н электрон полисшым мӧҥгышкыда email-ыш колтат.

Ты йӧн дене стаховой компанийын офисыштыже але агент дене ОСАГО договорым ыштыме годым кучылтмо тариф кагаз полисым возымо деч йӧршынат ок ойыртемалт. Кӧланже электрон йӧн чонжылан ок келше гын, ончычсо семынак офисыш миен ОСАГО-м налаш лиеш.

ОСАГО-м электрон йӧн дене налмын пайдаже вара могай? Пайда шуко:

йӧнан. Страховой компанийыш коштын да черетыште шоген жапым йомдарыме ок кӱл, пел шагатат сита;

лӱдыкшыдымӧ. Полис компанийын сайтыштыже возалтеш да тушан еҥын электрон кидпалыже шындалтеш. Тудым вашталтен возаш ок лий;

нимогай рекламе уке, ешартыш страховкым да сервисым огыт тушко;

чылажат куштылемдыме процедур дене ышталтеш;

келшыше страховщикым кычал коштын жапым йомдарыман огыл;

оксам безналичный йӧн дене тӱлыман. Оксам кусарымеке, полис икмыняр жап гыч мӧҥгышкыдак компьютерыш толеш;

полис эреак пелен лиеш. Тудо тендан почто яшлыкыштыда аралалтеш, тыгак сайтыште тендан личный кабинетыштыда автоматически возалт кодеш. Кумылда почеш полисым печатлен лукташ але смартфоныштыда Passbook/PassWallet-еш арален кодаш лиеш.

Кугыжаныш услуго портал гоч страховкым возымашын уда велжат уло:

у автомашиналан полисым электрон (онлайн) йӧн дене возаш ок лий. Тидлан госномерын данныйже кӱлыт, тудыжым ГИБДД страховкым ончыктымо деч вара гына пуа;

икымше страховкым компанийын офисыштыже возаш логалеш, молан манаш гын клиент нерген сведений эн ончыч Российысе автостраховщик-влакын ушемышкышт (РСА) логалшаш. Шаблоным возымо годым йоҥылышым колтет гын, полисым от нал;

корно полицийлан электрон автогражданкын чын улмыжым тергымаште нелылык лектын кертеш. Корнышто шогымышт годым инспектор-шамыч тидым чылаж годым ыштен  огыт керт. Тергыме средстве уке годым ДТП-ым европротокол дене келшышын возен огыт сеҥе.

Палашлан: кодшо кечылаште Российын Банкше ОСАГО-н электрон  полисшым налме деч вара тудым 72 шагат эртымеке гына вийыш пурышылан шотлаш темлен. Тидыже мошенничество ваштареш кучедалаш полша. Кузе? Рӱдӧ Банкыште пеш тыглай пример дене умылтарат. Полисдыме южо водитель ДТП-ыш логалме деч вара гына ты кечынак пеш писын электрон полисым налаш тӧча. У йӧн почеш тидым ышташ чарак уке, а полис кидыштыже гын, тудо ДТП нерген 15-20 минут эртымеке веле увертара. Тыгай уда койыш ынже шарле манынак ОСАГО-н электрон полисшым пуымо жапым кум-ныл кечылан (но тылеч шуко огыл) шуят. 2016 ийыште ОСАГО почеш чумыр страховой оксам тӱлымаште чырык ужашыже (25 процент) тыгай мошенник-влаклан логалын. А тидыже 150-160 миллиард теҥге. 40 процент мошеничествыже полисым ДТП деч вара оформитлыме дене кылдалтын.

А.АНДРЕЕВ.

Опубликовать в Одноклассники

Добавить комментарий