27 июньышто Марий Элыш Россий президентын Юл кундем федерал округышто полномочный представительже Игорь Комаров паша дене толын. Тудын Волжск олаш миен коштмыж шотышто калыкын шонымашыжым лудаш темлена.
Надежда Александровна Ленькова, «Волжск ола» ола округым вуйлатыше, Волжск ола округын Депутатше-влак погынымашыжын председательже:
– Кугыжанышнам вуйлатышын полномочный представительжын мемнан деке толын коштмыжым оланан кӱкшӧ статусан улмыж дене келшыме, Волжскышто кугу вашталтышым илышыш пуртымо фактым пеҥгыдемдыме семын аклем.
Тӱҥ тӱткыш оланан негызшылан, шуко социальный аланын эҥертышыжлан шотлалтше Марбумкомбинатлан лийын.
Таче оланан Машиностроитель микрорайоныштыжо кызытсе жаплан келшыше у школ, 320 веран йочасад чоҥалтыт. Чыла тиде нацпроект-шамычым илышыш пуртымо кышкарыште ышталтеш. Тудын шукталтмыжым Президентын полномочный представительже эскера. Таче шкеак чоҥымо пашам ончыш, тудын сай акше мемнам куандара да ончыко каяш кумылаҥда.
Тылеч посна Волжскышто «Изи ола-влакын паркышт», «Ола кумдыкым тачысе илышлан келшышын тӱзатымаш» проект-шамыч илышыш пурталтыт. Ме кажне ийын федеральный программылашке логалаш тыршена да шонымашкына шуына. Тений «Ола кумдыкым тачысе илышлан келшышын тӱзатымаш» проект почеш Волжск 20 миллион теҥгем налеш. Олам умбакыжат тӱзаташ тӱҥалына.
М.ИВАНОВА
