Пенсий деч ончычсо ийготан пашадыме граждан-влакым ынде корно отрасльын квалифицироватлыме пашазыжлан, служащийжылан да кокла звено специалистшылан туныкташ тӱҥалыт.
Марий Элын Транспорт да корно озанлык министерствыжын корно озанлыкым виктарыме пӧлкажын начальникше Олег Веприковын мутшо почеш, таче корно аланысе чыла предприятийыште палемдыме специалист-шамыч огыт сите. Тидыже корно технике паркын чот тоштеммыж денат кылдалтын.
Кызыт корно пашаеҥлан шинчымашым пуымо кандаш организацийыште 11 программе дене туныктат.
Пенсий деч ончычсо ийготан граждан-влакын шинчымашыштым нӧлтымӧ, угыч але йӧршын вес профессийлан туныктымо программе дене келшышын, ий еда пашадыме 265 еҥым туныктен лукташ палемдыме.
М.ИВАНОВА
