Палынем ыле, Йошкар-Олаште йочам аҥысыр специализациян врачын приёмышкыжо кузе возаш?
Т.КУЗНЕЦОВА
Йошкар-Ола
Йодышлан Марий Эл Тазалык аралтыш министерствын ава улмым да йоча пагытым аралыме пӧлкажын начальникше Галина МУРЗАЕВА вашешта:
– Рӱдоласе чыла вич йоча поликлинике Л.И.Соколова лӱмеш Йошкар-Оласе йоча городской больницын структур подразделенийжылан шотлалтеш, сандене пациент-влакым оласе чыла поликлиникын врач-специалистше деке илыме кумдыкысо поликлиникыш пеҥгыдемдалтмым шотыш налде возаш лиеш.
Йочам врачын приёмышкыжо нине йӧн дене возаш лиеш:
- медицине организацийын регистратурышкыжо миен;
- йоча поликлинике-влакын колл-рӱдерыштын 23-27-75 номеран телефонжо дене;
- инфомат гоч;
- Интернет кыл гоч.
Интернет полшымо дене врач деке Регионысо медицине услуго портал (https://portal12.is-mis.ru) да Ик кугыжаныш услуго портал (https://www.gosuslugi.ru) гоч возалташ лиеш. Тыгай йӧн шуматкече да рушарня деч моло чыла кечын 14 календарный кечылан пуалтеш.
Ик кугыжаныш услуго портал гоч 14 тӱрлӧ специалист: тӱшка практике врач, участковый терапевт да педиатр, хирург да йоча хирург, стоматолог-терапевт да йоча стоматолог, йоча да подростко психиатр, психиатр-нарколог – деке возалташ лиеш.
Тылеч посна фельдшер-акушер але фельдшер пунктлаште пашам ыштыше фельдшер, стоматолог-хирург, уролог (уролог-андролог), пӱй врач да медицине профилактике шотышто врач-шамычын приёмышкышт возалташ йӧн уло.
Ик кугыжаныш услуго порталыште моло специальностян врач деке эмлыше врачын электрон направленийже негызеш возалташ лиеш.
Профосмотр кышкарыште моло врач-специалист деке участковый медсестра але тудым алмаштыше вес пашаеҥ воза.
Нелын черланыше пациент-влаклан жапым шуйкалыде пуаш кӱлмӧ але вес жапыш кусараш лийдыме медицине полышым чыла врач ончылгоч возалтме деч посна пуа.
М.ИВАНОВА ямдылен
М.Иванован фотожо/ «Марий Эл» увер агентстве
