Тачысе лаштыкнан унаже – Курыкмарий кундемын ӱдыржӧ Ирина Салтыкова.
— МарГУ-што тунемат, слётлашке коштат, кундемыштет ик эн чолга еҥ улат. Чыла вере шукташ жапым да вийым кушто муат?
— Самырык годым чыла вере шукташ тыршыман, шкем чыла вере тергыман, жапымат муман. Тидлан лач ончылгоч шонкалыман, шкешотан планым ыштыман, тунам чыла вере шукташ лиеш. Марий самырык тукымын слётыштыжо кокымшо гана лийынам: ӱмаште — Оршанке район Кугу Ӧрша школышто, тений — Килемар район Церкысолаште. Икымше гана лиймем годым олыкмарла йӧршынат мутланен омыл. Кызыт ынде сайынак кутырем. Санденак слёт моткочак пайдале манын кертам, ынде мыйын кок шочмо йылмем уло.
Мый Курыкмарий кундемысе «МИГ» («Самырык-влакын инициативный группышт») ушемыште улам. Тений ме «Кравец» форумым нылымше гана эртаренна, тушто ответственный секретарь лийынам. Форум Микрӓк селаште школышто эртен. Ты мероприятийын ача-аважлан Марий самырык тукымын слётшым шотлыман, лач тушто ты форумым эртараш шонымаш шочын. «Кравец» форумыш утларакшым школышто кугурак класслаште тунемше йоча-влак чумыргат. Тений тудо Экологий темылан пӧлеклалтын ыле.
— Интернетысе соцкылыште почеламутет-влакымат ужаш лиеш.
— Ӱмаште «Кравец» форумышто «Лыдыш сем» проектым возенам. Тудын полшымо дене «Вконтакте» соцкылыште курыкмарий поэзийым шаркалем. Шкежат изиш возкалем.
— Лӱмет Российыште кумдан палыме эстраде мурызо гай. Тендан коклаште икгайлык уло мо?
— Тидым мылам шуко гана ойленыт. Мыят тудын семын мураш йӧратем, «Пеледыш» ансамбльыш коштам. Тыгак тӱрлаш, пидаш йӧратем. Ты паша мылам ласкалыкым пуа. Жап лийме годым лишылем-влаклан иктаж пӧлекым ямдылем, вет шке кид дене ыштыме арверыш чон шокшо, йӧратымаш пышталтеш.
— Тый туныктышын профессийжым ойырен налынат. Тудо тыланет мо дене шерге?
— Тений кумшо курсыш вонченам. Марий йылме ден литературым туныктышо лияш ямдылалтам. Мылам йоча-шамыч дене пашам ышташ келша. Воктенышт лийме годым илышын ямжым утларак шижат.
Но мыйым марий йылме урокын шагалеммыже тургыжландара. Мутат уке, мӧҥгыштӧ икшыве дене марла кутырымо шочмо йылмым кузе-гынат аралаш полша. Туге гынат ятыр жапшым икшыве школышто, йочасадыште эртара, а тушто марий йылмым туныктымо шагат эре изем толеш, а йочасадыште йӧршынат уке. Кызыт ты нелылык гыч лекташ ик йӧным гына ужам: мероприятий-влакым марла эртараш, школышто перемен жапыште марла мутланаш. Ӱшанем, ончыкыжым сай могырыш вашталтыш лиеш, йылмына умбакыжат илаш, вияҥаш тӱҥалеш. Самырык-влакат марий йылмышт деке мелын савырнат.
Лидия ШАБДАРОВА.
М.Скобелевын фотожо.
