Волжский кундемыште паша дене лиймыж годым Марий Элым вуйлатыше Юрий Зайцев кугу тӱткышым образований объект-влаклан ойырен.
«Образованийын школ системыжым уэмден вияндымаш» федеральный программе почеш, тений Волжск оласе 4-ше №-ан школым капитально олмыктымо. Тыгак «Образований» национальный проектын «Кызытсе школ» регионысо проектлан кӧра Памар кыдалаш общеобразовательный организацийыште естественно-научный да технический направлениян «Кушмо точко» рӱдерым почаш ямдылалтыт. Регионым вуйлатыше кок объектыштыжат лийын, вуйлатыше да туныктышо-влак дене вашлийын.
Волжскысо 4-ше №-ан школ 1981 ийыште чоҥалтын, сандене палынак тоштемын. Тидым шотыш налын, Марий Эл правительстве тудым келшыше федеральный программыш пурташ решенийым луктын. Тыге тунемме верым капитально олмыктымо пашалан 91,5 миллион теҥге ойыралтын. Тидын деч посна школ кумдыкыш асфальтым шараш 2,8 миллион теҥгем кучылтмо, кӱлеш оборудованийым налаш – 8,4 миллион теҥгем.
Тунемме верын директоржо Марина Янковскаян палемдымыж почеш, оралтын кӧргысӧ пӧлемже-влаклан дизайным ямдылымашке школын тунемшыже ушнен, кугурак класслаш коштшо-влак полшеныт. Ты общеобразовательный организацийыште талантан йоча-шамыч дене индивидуальный паша ышталтеш. Таче кечылан школышто начар тазалыкан 24 икшыве шинчымашым пога, аутизман тунемше-влаклан ресурс классым почмо. Кастене инклюзив мастерской ден усталык инклюзив студий-шамыч пашам ыштат.
Марий Элым вуйлатыше столовыйым, актовый залым, тӱҥалтыш класслам, йӱкаҥдаш студийым ончен лектын да олмыктымо пашам сай могырым палемден.
«1 сентябрьыште толшо йоча-влаклан школ келша манын шонем. Олмыктымо пашам жапыштыже ыштен шуктымылан куанем. Чоҥышо, тунемме верым вуйлатыше да ты сомылыш ушнышо чыла еҥлан тау», – каласен Юрий Зайцев.
Памар школышто лиймыж годым тудо ончыкылык «Кушмо точко» рӱдерыште ышталтше пашам ончен да палемден: ешартыш шинчымашым налаш тыгай кумдык тачысе кечылан келшыше сай качестван образованийым налаш моткоч кӱлешан.
Коммунал инфраструктур, тунемме верлам чоҥымо да олмыктымо, калыкын илыме верлашкыже пӱртӱс газым пуртымо паша – чыла тидын нерген Марий Элым вуйлатышын Волжск олаште да Волжский районысо Памар селаште эртарыме совещанийлаштыже каҥашыме.
Верлаш миен коштмо деч вара ыштыме иктешлымаш тыгай лийын: пӱсӧ йодыш-влак кокла гыч шукыжо эркын дене решатлалтеш. Юрий Зайцевын мутшо почеш, Волжск ден Волжский районышто аварийныйлан шотлалтше илыме вер гыч еҥ-влакым вес пӧртыш кусарыме программе, тулык икшыве-шамычлан пачерым пуымо да тунемме верлам олмыктымо паша графикымат ончылта. «Волжск оласе школ 1 сентябрьлан тунемше-влакым вашлияш ямде. Шушаш ийыште моло школым капитально олмыкташ тӱҥалына. Сай вашталтыш палдырна, но икмыняр объект шотышто йодыш уло. Эркын дене нунымат решатлена», – каласен регионым вуйлатыше.
Совещанийлаште тыгак Волжскышто вӱд пуч сеть, у коммуникацийым чоҥымо дене кылдалтше йодышлам тарватеныт. Тыгак Волжский районышто канализаций насос станцийым уэмдыме, Ӱлыл да Кӱшыл Азъялыш, Учимсолаш пӱртӱс газым пуртымо шотышто ойленыт.
Марий Эл Республикым вуйлатышын администрацийжын информаций паша пӧлкажын уверже негызеш Г.Кожевникова ямдылен.
