Оренбургышто эртыше окружной совещанийыште профориентаций да образований системыште цифраҥдыме шотышто Марий Элын паша опытшо дене палдареныт.
«Пайдале да таҥасен кертше экономике» нацпроектын «Паша лектыш» федеральный проектше почеш эртыше мероприятийыште республикнан образований да науко министржын алмаштышыже Андрей Сушенцов республикысе колледж ден техникумлаш черет деч посна тунемаш пурымо процессым оптимизироватлыме шотышто кейс дене палдарен. Пример шотеш тудо Йошкар-Оласе сервис технологий-влак техникумым конден. Марий Элын Профессионал-влакым ончылгоч ямдылыше рӱдерже «Абитуриентын навигаторжо: Марий Элысе колледжла мучко тыйын гидет» цифран сервисым ыштен. Тушто кыдалаш профессионал образованийым пуышо чыла организаций нерген уверым кумдан вераҥдыме. Тиде сервислан кӧра приёмный комиссий-влакын пашашт ятырлан куштылемын.
Тыгак республикыштына выпускник-влаклан ончыкылык профессийым ойырымо пагытыштышт «Профи-Туры» да моло мероприятий-влак полшат.
2026 ийыште «Пайдале да таҥасен кертше экономике» нацпроектын «Паша лектыш» федеральный проектышкыже регионын 76 тунемме организацийже ушнен.
Окружной совещанийыште Марий Эл, Йошкар-Оласе строительный техникум да Образований сферыште цифраҥдымаш федеральный институт коклаште вашкыл ойпидышым ыштыме.
Г.Кожевникова
Фотом Марий Эл Образований да науко министрын соцкылысе лаштыкше гыч налме
