25 апрельыште Шкетан театрыште «Folks» спектакльын премьерыже лиеш.
Тиде паша тӱҥалтышым кушеч налын? Карантин годым репетицийым кузе эртареныт? «Folks» манмыже мом ончыкта? Тиде да моло йодышлан вашмутым тудын режиссёржо Степан Пектеев, композиторжо Евгений Роднянский, художникше Екатерина Андреева да актёр Акпарс Иванов журналист-влаклан эртарыме пресс-конференций годым пуэныт.
Ик ияш паша
«Йыван Кырла. Путёвка в жизнь» спектакль лекме деч вара «Кырла 111» проект илышыш шыҥдаралтын. Тушто тӱрлӧ кундем гыч студент-влак Йыван Кырлан «Шочмо кече» почеламутшым лудыныт. Шуко йылме дене йоҥгышо произведенийым видеош войзымо тат студент жапым шарныктен. Вет тунам ик верыште от шинче, эре уым да оҥайым кычалат. Ты шижмаш спектакльым «шочыктен».
Ончыч «Zoom» приложений полшымо дене вашлийын, спектакль нерген мутланенна. Августышто, чодырашке каен, калык кокласе лагерьым ушештарыше верым ямдылаш йӧн лектын. Тидын деч вара иже сценыште репетицийым тӱҥалынна. Ямде «саскам» калык ончыко лукмешке идалык эртен», – палдарыш Степан Пектеев.
«Folks» декораций шотыштат ойыртемалтше. «Шке йоча годсо жапем ончыктымо шуын. Ончылно чыла корно почылтын, а тый тыгай виян улат, пуйто курыкым савырен кертат. «Сценыште – сандалык» манам гын, йоҥылыш ом лий», –чоным почо Екатерина Андреева.
Йот кундем гыч полшеныт
Спектакль шым йылме дене кая. Тиде – марий, руш, финн, немыч, итальян, испан, англичан. Чумыр текст руш йылмыш синхронно кусаралтеш.
«Ончыч историй рушла возалтын. Тӱрлӧ йылмыш келыштараш кусарыше, туныктышо-влак полшеныт. Кажныжлан кугу таум каласена. Мутлан, Маргарита Кузнецова финн да немыч йылмылаш кусарыме чын йоҥгалтме шотышто кугу пашам ыштен. Шке жаапыштыже Шкетан театрыште пашам ыштыше да кызыт Финляндийыште илыше Софья Чесноковат пеленна тыршен», – рашемдыш режиссёр.
Йылмым тунемаш куштылгыжак огыл. Актёр-влак, шинчымашыштым пойдараш манын, йот кундемысе йолташышт дене мутланеныт, тӱрлӧ передачым онченыт. «Спектакльыште йоҥгышо чыла йылмымат тунемаш кумыл лектын. Мутлан, мый спектакльыште итальянла ойлем, садлан тудым утларак шымлаш тӱҥалынам. Калыкын койыш-шоктышыжтымат умылаш тыршенам. Мом кочкыт, мом чият, яра жапым кузе эртарат – чыла шотыш налалтын», – умылтарыш Акпарс Иванов.
«Folks» – тиде мо?
Вуймут вигак шочын огыл. Ончыч тӱрлӧ калыкын йомакыштым ончыктынешт улмаш. Тидлан «Азбука» лӱмым ойырен налыныт. Но ты шонымаш кумдаҥын. Спектакльыште икте кочаж дене палдара, весе калык легендым шарналта, кумшо шке шонен лукмыжым ойла. «Folks» манмыже келшен толеш. Вет тудым икмыняр семын кусараш лиеш: «самырык-влак» але «калык-влак». Тиде мут тӱрлӧ шонымашым ончыктымыж денак шерге.
Театрын йолташыже-влак
24 апрельыште спектакльым лукташ полшышо-влаклан ончыктат. Тидын шотышто С.Пектеев тыге каласен: «Шкетан театрын йолташыже-влак лектыныт. Тиде пеш куандара. Спонсор полышым пуымылан кӧра постановкыш икмыняр ешартыш-влак пуреныт».
О.МОШКИНА
