Республикнан рўдолаштыже йолын эртыме годым я ик вере, я вес вере йолешке-влаклан корным петырыме – кумдыкым ошалге-йошкар тасма дене йыр авырен налме. Тыгай сўретым утларакше оланан сылне верлаштыже ужаш лиеш. Тидлан амалжат пеш кугу – 23 июнь гыч Йошкар-Олаштына «Цветик-семицветик» мюзиклым сниматлаш тўҥалыныт. Ты паша 9 июль марте шуйна.
Валентин Катаевын кумдан палыме йоча йомакше почеш фильмым ямдылымаште режиссёр Андрей Огородников вуйын шога. Андрей республикыште илыше-влаклан документ-влак негызеш ямдылыме «Евсеев. Признание ценою в жизнь» кино гоч палыме. Автор тудым шукерте огыл калык ончыко луктын ыле.
«Цветик-семицветик» кинон съёмкыжо икмыняр площадкыште: Сеҥымаш паркыште, Пресвятой Дева Мариян площадьыштыже, Какшан сер воктене, «В космос» памятник-фонтан дене, Чавайн бульварыште, Воскресенский паркыште, М.Шкетан лўмеш Марий национальный театр ончылно… – эрташ тў‰алеш.
Теве, мутлан, кушкыжмын паша деч вара остановкыш ошкылмем годым памятник-фонтан дене съёмко эрта ыле. Кином ямдылыше кугу командын пашажым эскераш, икшыве-влакын модмыштым ончаш о‰айын чучо. Весат куандара: мыйын гай єрдыж гыч ончен шогышыжо шукынак ыльыч.
Палемдыман, Э.Сапаев лўмеш опер да балет академический театрыште «Цветик-семицветик» мюзиклын премьерже ўмаште 1 июньышто лийын. Ты проектыште самырык артист, музыкант, куштышо, мурышо-влак – чылаже 300 утла еҥ мастарлыкым ончыкта.
А.Байкова
Д.Гусевын фотожо
