Вера, Верук, Верунчик!
Журналист аланыш толмыж деч ятыр ий ончычак Вера Горохова, сценыш мыскара дене лекмекыже, вигак кумылым налын. Шуко гана тудо «Воштылаш, товатат, сулык огыл» конкурсышто воштылтарен, варажым жюри еҥ семын молым аклымаштат лийын. А таче В. Горохова посна программе дене Йошкар-Оласе эн кугу зал-влакым чумырен кертеш, тудын концертыш билетым кок арня ончычак пытен ыле.
Вера икымше гана сценыш 20 ий ончыч лектын улмаш. Тиде амал денак у программым ямдылен. Мыскарам калык деке намиен шуктымо мастарлыкшылан мокталтыде огеш лий. Залым воштылчык дене кӧ эше ик шӱлышыштӧ кужу жап кучен, ончаш толшо-влак дене ик «йылме» дене мутланен мошта манын шонкалышым. Ик-кок еҥым ты радамыш пурташ лиеш ыле такше. Но рушла мутсавыртышым В.Горохова деч ятырлан шуко кучылтыт але кагаз деч посна «йомыт» манаш моли. А ты касыште колыштат да умылет: тидым кагазыш пыштыме, вес йылме гыч кусарыме огыл (такше ыле ик-кок мыскараже), а илышыште лийше, ялыште, вате-марий, пошкудо коклаште лийше томаша, воштылчык. Чынак илыш гыч, сандене калык вигак умыла, утен каен воштылеш, кунамже шкенжым я пошкудыжым пален налеш. Тидым ме шижынна Вера Горохован сценыш лекмыж годымат, Морко район Кушна кундем, Советский район Кужмара кундем гыч толшо артист-влакын мыскарашт гочат. Эсогыл Кельмаксола ял пошкудыжо Виктор Комаров койдарчык мурыжо-влак денат илыш ойыртемым «пӱшкылаш» тӧчыш.
Чумыр налмаште, тачысе кечын марий мыскара жанр кугу кӱкшытыштӧ манын огына керт. Туге гынат ик кечыште, 31 мартыште, Йошкар-Олаште кок вере тыгай кас, Ленин лӱмеш тӱвыра полатыште да М.Шкетан лӱмеш театрыште, тичмаш зал дене эртаралтеш гын, тугеже тиде жанр вияҥме корнышто. Марий мыскарам, фельетоным возышат кызыт уке, манаш лиеш. Тидын шотышто «Марий Эл» газет редакцийыште кызыт Виктор Степанович Соловьёвын уэмден ешарыме «Манеш-манеш» мыскыра-влак сборникшым (200 утла лаштыкан) савыкташ ямдылыме книгат мыняр-гынат полшен кертеш. Сай качестван мыскара лийже манын, ты жанр дене, очыни, посна конкурсымат эртырыман, сценыш лукмо деч ончыч, текст шотышто.
В.Горохован касыштыже тӱҥ шотышто Володя Матвеевын мыскараже-влак йоҥгеныт. Йоҥгеныт лачымын, уто-сите деч посна. Верунчик шкежат, кушто кӱлеш гын, сценарий деч ӧрдыжкӧ кораҥын воштылтара, зал дене пашам ыштыме годым тӱрлат лиешыс. Шке жапыштыже Августа Романова мӱшкыр кучен воштылтара ыле (чаманем, сценыш ок лек), таче ты кӱкшытым Вера, тый кучет, ӱшандарен моштет. Мыскара жанрыште веле огыл. Арам огыл кочо пӱрымашан ӱдырамашын (85 ияш героине шкежат сценыш лектын, пайрем озалан сугыньлен ойлыш) монологшым модын эртарымет деч вара эргыч, шинчавӱдет ӱштылын, «Авай, ит шорт» манын лыпландарыш.
Верук, тыланем умбакыжат вияҥаш, у кӱкшытыш шуаш!
С.Пехметова
В.Поликарповын фотожо
