Тыгай фестиваль-конкурс 1-6 декабрьыште И.С.Палантай лӱмеш тӱвыра да сымыктыш колледж пеленысе йоча искусство школышто эртен.
Тудо Марий Элын 100 ияш лӱмгечыжлан пӧлеклалтын. Сандене усталык шӱлышан таҥасымашым ты гана музык пайрем семын эртен. Тыгодым тӱрлӧ школышто тунемше-влак икте-весын мастарлыкшым ончен кертыныт.
Дистанционный йӧн дене эртаралтше конкурсыш 200 утла участник ушнен. Нуным жюри аклен. Туштыжо Татарстан, Чуваший да Марий Эл гыч кумдан палыме еҥ, преподаватель-влак лийыныт. Жюрим тӱвыра да сымыктыш колледжын директоржо Алексей Паскичев вуйлатен. Нуно шкенан кундемысе веле огыл, Чуваш республик, Астрахань ола гыч исполнитель да нунын преподавательышт ден концертмейстерыштын мастарлыкыштым кӱкшын акленыт.
Мемнан республик гыч сеҥышыш Ада Кашкова – виолончель (Йошкар-Оласе П.Чайковский лӱмеш йоча искусство школ), Алия Мусина – фортепиано (Йошкар-Оласе 3-шо №-ан искусство школ), Елизавета Шишкина ден Семен Бурков – вокал (И.С.Палантай лӱмеш тӱвыра да сымыктыш колледж пеленысе йоча искусство школ) да молат лектыныт.
А.БАЙКОВА
Фотом сымыктыш школын архивше гыч налме
