Пошкырт кундемысе Мишкан селаште финн-угор тӱнян тенийысе рӱдывержым торжественно почыныт.
Тиде лӱмым Мишкан кодшо ийын тӱнямбал кӱкшытыштӧ эртыше конкурсышто сеҥен налын. Торжественный церемоний годым Мишкан ялсоветым вуйлатыше Рустам Ишмакаевлан Марий Элысе Морко район Унчо ял шотан илем вуйлатыше Иван Евсеев финн-угор калык-влакын символыштым — шулдыран кайыкым – кучыктен, вет кодшо ийын тыгай рӱдывержылан лач Унчо шотлалтын. Вашешыже Мишкан села вуйлатыше пу гыч пӱчкеден лукмо маскам пӧлеклен. А копаштыже маскаже саде шулдыран кайыкетым куча. Лач ты янлыкым пошкырт марий-влак идалыкын символжылан ойырен налыныт.
Пайремыш шуко лӱмлӧ уна миен. Тидын нерген Мишкан районысо тӱвыра полатын сайтыштыже ончыкталтын. Нунын коклаште Башкортостан Республикын тӱвыра министржын икымше алмаштышыже Н.Лапшина, Башкортостан Республикысе Калык-влакын келшымаш пӧртыштын директоржо И.Султанмуратов, Россий Кугыжаныш Думын депутатше, паралимпий чемпионко Р.Баталова да молат лийыныт. Башкортостанысе районла гыч веле огыл, тыгак Татарстан, Мордовий, Удмуртий, Марий Эл, Венгрий, Эстоний гыч делегаций ден творческий коллектив, уна-влак миеныт. Мемнан делегацийым респубикысе Марий тӱвыра рӱдер директорын алмаштышыже, финн-угор тӱнян рӱдывержым ойырышо тӱнямбал конкурсын жюри членже Василий Петров вуйлатен.
Пайрем программе поян да тӱрлӧ сынан лийын. Уна-влакым марий мелна, башкир чак-чак да руш каравай дене сийлен вашийыныт. Районысо тӱвыра полатын кокымшо пачашыштыже кидмастар-влакын ончерышт пашам ыштен. Торжественный ужашыште театрализованный представлений гоч Мишкан марий села да тудын калыкше дене палдареныт. Кугу концерт кумылым нӧлтен. А вара уна-влакым Озерка, Йылыш, Ирсаял, Монар да Айбылат яллаш наҥгаеныт. Кажныштыже Шорыкйол пайрем эртен.
Палемден кодыман, финн-угор тӱнян рӱдыверыштыже идалык мучко калык йӱла да тӱвыра дене кылдалтше шуко мерприятий эртышаш. Мутат уке, тушко тӱрлӧ кундем гыч уна ден турист-влак мияш тӱҥалыт. Торжественный церемоний годым Мишкан район администраций вуйлатыше Павел Трапезников, уна-влакым саламлышыла, финн-угор калык-влакын икоян лийын моштымыштым да лишыл улмыштым палемден. Идалык мучко Мишкан калык рӱдывер улмым пеҥгыдемдыше пашам кӱлеш семын шукташ тӱҥалеш манын ӱшандарен.
Ушештараш уто огыл, але марте финн-угор тӱнян рӱдыверже Быги лӱман одо ял (2014 ий), Эстонийысе Обница ял (2015), Венгрийысе Искасентдьёрд ял ден Веспрем ола (2016), Карелийысе Вокнаволок ял (2017) да Марий Элысе Унчо села (2018) лийыныт. «Финн-угор тӱнян рӱдыверже» проект МАФУН-ын да «Центр развития коренных народов URALIC» НКО-н темлымышт почеш илышыш шыҥдаралтеш.
С.НОСОВА
Фотом Мишкан районысо
тӱвыра полатын сайтше гыч
налме
