Йошкар-Олаште Пеледыш пайрем 27-28 июньышто эрташ тӱҥалеш.
Тудо Российыште Шочмо элым аралышын идалыкшылан да Кугу Отечественный сар годым Сеҥымашлан 80 ий теммылан пӧлеклалтеш. Мо тушто лиеш? «Йыр куштымаш», «Кудо – еш аралтыш», «Ик еш дене», «Унам вашлиймаш да туризм», тыгак «Марий тӱрын моторлыкшо» калык вургем да «Пеледше кундем» фестиваль-влак. Самырык-шамычлан «Арт-Мари: Рвезылык. Усталык. Акыл» посна программым ямдылат.
«Мастар кид» ярмиҥгаш, «Пеледыш пайрем – самырык сӱретче ден фотограф-влакын шинчашт дене» этнопленэрыш ушнаш лиеш.
Спорт дене кылым кучышо-шамычым этноспорт фестиваль, а икшыве-шамычым «Модыш алан» вучат.
Фестивальым Марий Элын Тӱвыра, савыктыш да калык-влакын пашашт шотышто министерствыжын полшымыж дене републикысе Калык усталык рӱдер «2013-2030 ийлан Марий Эл Републикын кугыжаныш национальный политикыже» кугыжаныш программе почеш эртара.
Положений дене келшышын верла гыч толшо усталык коллектив-влак шке кундемыс калыкын ойыртемалтше койышыжым ончыктышаш улыт. Пеледыш пайремыш ушнаш кумылан-влак 10 июнь марте cultur@mari-el.ru электрон почтыш йодмашым колтышаш улыт.
***
14 июньышто Курыкмарий районышто регион-влак кӱкшытан «Пеледӹш айо» XIV муро пайрем лиеш. Тушко вокально-хоровой коллектив-влакым ӱжыт.
Российыште марий-влакын тӱшкан илыме регионлаште Пеледыш пайрем-влак тыгай кечылаште эртат:
Санкт–Петербургышто – 24 майыште (Дубровко посёлкысо «Невский» паркыште);
Татарстаныште – 31 майыште (Семык, Кукмарий районысо Уялыште);
Удмуртийыште – 6-7 июньышто (Семык, Кизнер районысо Марий Сарамак ялыште).
Москваште – 7 июньышто.
Светлана Носова
Михаил Скобелевын фотожо
