КАЛАСЕ, "МАРИЙ ЭЛ"

Шонымо семын – огеш лий

Пӱртӱс лоҥгаште торым кышкыме верым шке гыч ыштымылан мут кучаш шогалтен кертыт мо?

И.Морозова.

Кужэҥер район.

Йодышлан Марий Элын Пӱртӱс поянлык, экологий да йырым-йырысе средам аралыме министерствыжын пресс-службыштыжо тыге вашештеныт:

– Шӱкшакым мландыш кышкымылан штрафым тӱлыктат. Тыглай граждан-шамычлан тудын кугытшо 1 гыч 2 тӱжем теҥге марте шуэш. Мутлан, Медведево район Апшакбеляк ялыште илыше-влак торым автомашина дене конден ястарышым ужыныт. Тыгай годым полицийым ӱжыктыман, але фактым фотош, видеош войзен налман. Пелен телефон але фотоаппарат уке гын, машинан номержым шарнен кодман да вара участковыйлан але Марий Элын Пӱртӱс поянлык, экологий да йырым-йырысе средам аралыме министерствышкыже увертарыман. Апшакбелякыште торым кышкыме верым ыштыме шотышто кызыт тергымаш кая.

Каласен кодыман, санкций деч посна свалке ышталтын гын, тудын вераҥме участкын озажланат мутым кучаш логалеш. Тыглай граждан-влаклан штрафын кугытшым 1 гыч 3 тӱжем теҥге марте, организаций ден предприятий-шамычлан 100 гыч 250 тӱжем теҥге марте палемден кертыт.

С.НОСОВА ямдылен

Опубликовать в Одноклассники

Добавить комментарий