ШИНЧЫМАШ КУГОРНЫШТО

Шанче  фестиваль: Шинчымашым модыш гочат налаш лиеш

8 февральыште  Российыште Наукын кечыжым палемденыт. Марий кугыжаныш университетыште тиде пайремлан пӧлеклалтше Шанче фестиваль кандашымше гана почылтын. 

МарГУ-н тӱҥ корпусыштыжо квест шотан «Науко деке лишем» модыш эртен, Йошкар-Оласе школлаште тунемше ден студент-влак тӱрлӧ станцийыште шанчын ужашыжла  дене палыме лийыныт. Ик вере икымше медицине полышым пуаш тунемыныт, айдемын могай органже-влак кушто верланымым да могай пашам шуктымым, весыште Марий Элын тӱрлӧ заповедникше, кундемыштына  могай кушкыл кушмым,  янлык илымым пален налыныт.  Тыгак тӱрлӧ таман шере  торыкым тамлаш, шкешотан йӱышым, смузим, йӱаш йӧн лийын.

А вузыш пурымаште  фестивальыш мийыше еҥым трансформер-влак  вашлийыныт. Нуно кажне кумылан дене пырля войзалтыныт. Тыгак  акрет жапысе динозаврын лулегыжат ӧрыктарен. Тудын воктенат шукын шарнаш кодшо фотом ыштеныт.

Тыгак  парт коклаште шинчыше-шамыч конструктор гыч А. Мейлон научный вездеходшым погеныт. Поснак шукын фотобудко воктене погыненыт. Тыште шкем полицейский, царевна, тӱрлӧ йомакысе герой семын шижаш лийын. Телефонысо приложений полшымо дене Россий президент В.Путин дене пырлят войзалташ лийын. А «Наукын театрже» станцийыште театр гримым пыштеныт да кокла курым жапысе вургемым чиктеныт. Рвезе-шамыч робот полшымо дене футболла модыныт.

Фестиваль жапыште «Мо? Кушто? Кунам?» модыш «Юл кундем федерал округысо интеллектуал олимпиаде» проект кышкарыште эртен. Студент-влак коклаште икымше верым «МарГУ-н сборныйжо» команде сеҥен. А школышто тунемше коклаште икымше верыш Руэмысе шуко профилян лицей-интернатын командыже лектын. Нуно республикнан чапшым окружной модышышто аралаш тӱҥалыт.

Тылеч посна Актуальный шанче кино фестивальыштат шуко оҥайым пален налаш лийын. Уна-влак науко, технологий, шанчызе-шамыч, тӱрлӧ почмаш (открытий) нерген Российысе да йот элласе фильм-влакым онченыт.

Шанче фестивальын торжественный ужашыштыже Марий Эл Правительстве председательын алмаштышыже И.Дравниеце, республикысе образований да науко министр Н.Адамова, вуз-влакын ректорышт  салам мутым ойленыт да тений шанче пашаште ойыртемалтше-влакым Тауштымашан серыш дене палемденыт.

А фестиваль ий мучко шуйна. Вузлаште, школлаште тудлан пӧлеклатше ятыр мероприятий лиеш.

Л.ШАБДАРОВА.

 

Опубликовать в Одноклассники

Добавить комментарий