ӰДЫРАМАШ КОРНО ШИНЧЫМАШ КУГОРНЫШТО

Туныктышо Наталья Петрова: «Лач школышто мый вийым налам, шулдыраҥам»

Йошкар-Оласе 15-ше №-ан школышто тӱҥалтыш класслаште туныктышо Наталья ПЕТРОВА оласе школышто пашам ышта гынат, икшывым марий йылмылан кумылаҥда. Тиде сомыллан тудо уло чонжым пуа.

–  Наталья Ивановна, тачысе кечын  Йошкар-Оласе тӱҥалтыш класслаште, ФГОС дене келшышын, марий йылмым огыт туныкто. Туге гынат Те икшыве-шамычым йылмыланна кумылаҥдеда.…

Мый изинек марий йылмылан шӱман улам. Марий пединститутым тунем пытарымеке, 29-ше №-ан школышто марий йылмым ик ий туныктенам. А вара тиде школыш кусненам. Тыште ынде 10 ий пашам ыштем. Чаманен каласыман, 15-ше №-ан школышто марий йылмым йӧршын огыт туныкто. Но мый йоча-влакым марий йылмылан тӱрлӧ семын шӱмаҥдем. Марий икшывым гына огыл, а вес калык гыч лекше ӱдыр-рвезымат. 

Ме тӱрлӧ марий конкурслаш ушненна. Мутлан, Самырык тукым конкурсышто тунемшем-шамыч ик гана веле огыл усталыкыштым ончыктеныт. Тыгак тоштерыш чӱчкыдын коштынна. Классыште тӱрлӧ мероприятийым эртарыме годым марий почеламутым тунемынна, мурым муренна, йомакым лудынна.  Шукыштлан «Ешыштем калык йӱла» темылан пӧлеклалтше урок келшен. Йоча-влак республикыштына илыше тӱрлӧ калыкын тӱвыраже, йӱлаже нерген пален налыныт.  Тидын годым тунемшем-шамычын ача-аваштлан таум каласыман. Нуно мыланем эре полшеныт, марий йылме, тӱвыра огеш кӱл манын ик ганат ойлен огытыл. Мемнан классыште эртарыме марий мероприятийыш кумылын коштыныт.

Тыгак ме «Кече» журналым, «Ямде лий» газетым лудына.Нине савыктышлаште тунемшем нерген ик гана веле огыл возеныт. Икманаш, икшыве марий йылмым йӧратыже манын, тӱрлӧ йӧным кучылташ тыршем.

– Кызыт  самырык-влак школыш шагалын пашам ышташ толыт. Тендан шонымаште, амалже могай?

Кызыт школышто паша ятыр. Поснак документ дене шуко шинчылтман. Икшыве-шамычат тенийысе пагытыште шкешотан улыт. Очыни, шукын чыла тидым огыт чыте да школ гыч каят. Ялласе школ-шамыч петырнат. Молан манаш гын икшыве шагал. Тушто утларакшым илалше да шке пашаштым чынжымак йӧратыше туныктышо-влак гына кодыныт. Вузым, ссузым тунем пытарыше самырык туныктышылан кызыт полшышыжат шагал. Воктенышт туныктен шогышо опытан туныктышо лиеш гын, пашам ышташ кумылышт лектеш ыле. Тидын шотышто мыланем пиал шыргыжалын.

15-ше №-ан школыш пашам ышташ мийымекем, мылам тунамсе школ вуйлатышын алмаштышыже Виктория Ивановна Батюкова полыш кидшым шуялтен. Тӱҥалтыште кажне урокышкем коштын манаш лиеш, каҥашым пуэн, йоҥылышем тӧрлен каласен. Тудлан кугу таум ойлем.

– Икшывыда-влак марий шӱлышан кушкыт. Оласе кумдыкышто тидым ышташ куштылгыжак огыл…

Ме мӧҥгыштӧ марла гына мутланена. Даниил эргым изинек марий конкурслаш чӱчкыдын коштын, сеҥымашыжат лийын. Кызыт тудо спортлан шӱмаҥын, олимпийский резерв училищыш 9-ше класс деч вара тунемаш пурен. Илышыжым спорт дене кылдынеже.

Даша ӱдыремат марий кумылан кушкеш. Поснак марла мураш йӧрата. Икмыняр жап Сания Рамай дене мураш тунемын, варажым Марий тӱвыра рӱдер пелен пашам ыштыше «Юкече» ансамбльыш коштын. Школышто эртаралтше мероприятийыштат марла мура. Но кызыт тиде сомылнам изиш ӧрдыжкырак шӱкалаш логалеш. Мемнан йӱк связкына эмганен, садлан тӧрланымешке чыташна перна.

– Туныктышо ик верыште шогышаш огыл. Тудо эре шуаралтеш, уым пален налаш тырша. Очыни, тенданат тыгак?

Кызыт мый МарГУ-што магистратурышто тунемам. Руш ден марий йылмым шымлем. Шукерте огыл филологий науко доктор, научный вуйлатышем  Любовь Алексеевна Абукаева дене пырля «Шочмо йылмым йӧратыме нерген» статьям ямдыленна да тудым савыктен лукна. Тушто йылмынан, калыкнан историйжын, тӱвыражын  кӱлешлыкше нерген ойлалтеш.

– 1 сентябрьыште адакат икымше классым туныкташ тӱҥалыда. Чонда, очыни, вургыжеш?

Кеч-могай туныктышынат шӱмжӧ тыгай годым чӱчкыдынрак пылтка. Мый нине изи падыраш-шамыч дене шинчымашыш икымше ошкылым ыштем. Нунын дене пырля тунемам, куанем, илышым шымлем. Но мылам тиде келша. Лач школышто мый вийым налам, шулдыраҥам.

–Шушаш у тунемме ий, Шинчымаш кече дене саламлем, пашада ушныжо!

Тау!

Лидия ШАБДАРОВА.

(Фотом еш альбом гыч налме.)

Опубликовать в Одноклассники

Добавить комментарий