Руэмысе шуко профилян республикысе лицей-интернатын Талантан икшыве-влак дене пашам ыштыме рӱдерыштыже эртыше кугарнян «Великолепная пятёрка» модыш-конкурс эртен. Тушто Марий Элысе 10 школ гыч 8-ше класслаште тунемше ӱдыр-рвезе-влак шинчымашыштым ончыктеныт.
— Ты конкурс ынде визымше гана уста ӱдыр-рвезе-влакым чумыра. Тудо талантан икшыве-влакым умбакыжат кушкаш кумылаҥдаш манын эртаралтеш. Мероприятий нунылан шке ончылнышт кугу цельым шындаш да тудым шукташ шӱкалтышым пуа, — каласен Руэмысе Талантан икшыве-влак дене пашам ыштыме рӱдерым вуйлатыше Галина Аркадьевна Калинина.
Тунемше-влак тӱҥалтыште физике, математике, химий, руш йылме, биологий предметла дене практический заданий-влакым ыштеныт. Тыгодым вич еҥан командыште кажныже шке предметшылан вуйын шоген да конкурслан лач тиде темылан кыртмен ямдылалтын.
Варажым конкурсын участникше-шамыч «Мо? Кушто? Кунам?» викториныш чумыргеныт. Тушто нунылан кӱшнӧ каласыме вич предмет дене 20 йодышлан вашешташ логалын. Тыгодым йодыш-влак шкешотан лийыныт. Нунылан вашешташ манын, ойыртемалтшын шонен моштымо кӱлын.
Кажне командыжак чапле шинчымашыж дене ойыртемалтын огыл. Южышт икмыняр йодышлан гына чын вашештен кертыныт. Тыге кумшо верым Звенигово оласе лицей, кокымшо верым Шернур поселкысо 1-ше №-ан школын тунемшыже-влак налыныт. Сеҥышыш Советский районысо Ургаш лицейын ӱдыр-рвезыже-шамыч лектыныт.
— Тений конкурсыш молгунамсе деч ятырлан шуко команде чумырген, санденак сеҥышыш лектына манын шонен огынал. Очыни, тидланак кӧра икымше верна мыланна моткочак шерге. Тыгак руш йылме ден литературым туныктышына Венера Александровна Тороповалан таум каласена. Тудо мыланна ямдылалташ полшен да ончыко ошкылаш вийым пуэн. Тыгак йодыш-шамычлан чын вашешташ икте-весылан ӱшаныме, командын икоян улмыжо полшен, — куанышт дене пайлалтыч Ургаш лицейын тунемшыже-влак.
Лидия ШАБДАРОВА.
М.Скобелевын фотожо.
