Калык-влак кокласе кылым пеҥгыдемдаш манын, этнокультур проектлам илышыш пуртымо мер пашаш республикыш йот элла гыч тунемаш толшо студент-влакым ушаш. Тыгай пунчалым Марий Эл Республикым вуйлатыше А.Евстифеевын вуйлатымыж почеш правительствысе кугыжаныш национальный политикын концепцийжым илышыш шыҥдарыме шотышто комиссийжын заседанийыштыже луктыныт.
Марий кугыжаныш да Юл кундем кугыжаныш технологий университет-шамычын ректорышт тиде йодыш дене кылдалтше пашашт дене палдареныт. Мутлан, Волгатехыште, тудын ректоржо В.Шебашевын мутшо почеш, «Россий Федерацийыште национальный политике да этноконфессий-влак кокласе кылым виктарымаш» магистр программе илышыш шыҥдаралтеш. Тудын тӱҥ шонымашыже – палемдыме областьлаште профессионал-влакым ямдылаш.
Марий кугыжаныш университетын ректоржо М.Швецов вузышто пашам ыштыше Интернационал келшымаш клубын пашаж дене палдарен. Тушко 1200 утла йот студент ушнен. Клуб пелен тӱрлӧ ушем-шамычым чумырымо.
Иктешлен каласаш гын, кок вузыштыжат йот элла гыч тунемаш толшо самырык еҥ-влак дене паша ышталтеш.
Марий Элым вуйлатыше нунын йылмым палыме, илыме верышт, тыгак республикыштына пашаверым мумышт да илаш кодмышт шотышто йодышым пуэн.
Тидын деч вара погынышо-влак 2025 ий марте Россий Федерацийыште кугыжаныш национальный политикын стратегийжым илышыш пуртымо дене кылдалтше йодышым каҥашеныт. Тидын шотышто ышталтше пашам Параньга район администраций вуйлатышын алмаштышыже О.Попов кумдан палдарен.
Заседанийын вес темыже «Марий Эл Республикыште конфессий да калык-влак кокласе кыл» социологический шымлымашын иктешлымашыже лийын. В.М.Васильев лӱмеш МарНИИЯЛИ-ште тиде направлений дене пашам ыштыше О.Орлован ойлымыж почеш, кундемыштына тиде йодышым 1994 ий гычак шымлаш тӱҥалме да кызытат ик кӱлешанлан шотлалтеш, молан манаш гын Марий Эл – Российын шуко калыкан да конфессиян регионжо.
Кызыт республикыште 155 религиозный организаций уло. Регистрироватлалтше 106 общине Моско Патриархатын Православныйлан черкышкыже пура. Тидын деч посна Марий йӱла дене кылдалтше 13, а мусульман дене 18 общине уло.
Социологический шымлымаш почеш, конфессий-влак кокласе кыл сай, тидым икте-весе дене ешым ыштымат пеҥгыдемда.
«Республикыште национальный политике дене кылдалтше йодышым ме моткоч кӱлешанлан шотлена. Чыланат келшен да икте-весым пагален илышаш улына», – каласен регионым вуйлатыше. Тудын мутшо почеш, Марий Элыште Калык-влакын келшымаш пӧртыштым ыштыме паша кая, тидын нерген Россий Правительстве пӧртыштат каҥашыме.
Марий Эл Республикым вуйлатышын организаций да аналитике виктемжын уверже негызеш Г.Кожевникова ямдылен.
