УВЕР ЙОГЫН

Тый кертат…

НТВ телекомпаний «Тый – супер!» («Ты – супер!») программын у кастингшым увертара.

Проектыште йочапӧртыштӧ, опекун ешыште, неле еш ситуацийыш логалмылан кӧра интернат-школышто илыше уста йоча-влак мастарлыкыштым терген кертыт.

Тиде проектын южо конкурсантше ешыште илаш тӱҥалын, южыжо профессийым ойырен налын. Шуко участник музыкальный училищыш шинчымашым погаш пурен але школ деч вара тушко тунемаш каяш кумылаҥын. Йоча-шамыч ола, регион, Россий кӱкшытыштӧ эртыше ятыр мероприятийыште участвоватлат. Нуно композитор Игорь Крутойын ӱжмыж почеш У толкынышто (Новая волна) почётан уна семынат лийыныт. Конкурсант-шамыч кокла гыч пелыже «Артекыште» каненыт, тыгак НТВ телеканалын «Тый – супер, У ий!» программыштыже участвоватленыт. Ӱдыр-рвезе-влак шке кумирышт дене палыме лийыныт, у йолташым муыныт да кызытат келшат.

Кастинг деч вара конкурс Москваште эрта. Йоча да нуным кондыштарыше-влакын корно, илыме, кочмо роскотыштым НТВ телеканал шке ӱмбакыже налеш. Тунемме ий жапыште йоча-влакын занятийышт шинчымашым пуымо программе почеш эрта. Проектыште психолог ден медперсонал-влак лийыт.

Йодмашым 2018 ий 20 ноябрь марте колтыман. Тудым кузе пуаш кӱлмым «Тый – супер!» конкурсын  положенийыштыже да конкурсын страницысе www.ntv.ru сайтыштыже радамлын возымо.Тыгак vorontsova-tv@mail.ru электрон адресыш серышым возен колташ лиеш.

М.ИВАНОВА. 

Опубликовать в Одноклассники

Добавить комментарий