Республикысе коваште-венерологий диспансер 2018 ийым Коваште ракым тӱҥалтыш йыжыҥыште диагностироватлыме ий семын увертарен.
Меланомым диагностироватлыме всероссийский кечын диспансерын специалистше-влак идалыклан ик гана поснак шуко калыкым тергат, тыгодым кажне латкокымшо пациентын коваште рак, кажне витлымше пациентын меланомо дене орланымыштым рашемдат. 2016 ийыште онкологий чер кокла гыч коваште рак икымше верыш лектын. Марий Элыште тудын 310 у случайжым регистрироватлыме.
Тергыме кечын приёмыш утларакше пенсий ийготан пациент-влак толмым шотыш налын, диспансерым вуйлатыше-шамыч шушаш ий мучко предприятий ден организацийлашке, тыгак республикысе районлашке пашам ыштен кертше ийготан граждан-шамычым тергаш лекташ кутырен келшеныт.
Шымлымаш кызытсе жаплан утларак келшен толшо дерматоскопий йӧн дене эрта. Неле случайыште врач-влак фотодокументированийым ыштат, умбакыже тиде сӱретым кугемден шымлат да диагнозым шындат.
Меланомо – моло деч палынак ойыртемалтше пуалше. Тудым пациентат, тӱшка практике врачат кужу жап шекланыде кертыт, сандене кӱкшӧ квалификациян специалист-шамычын диагностикыштым эрташ тыршыманак. Нуно гына черым тӱҥалтыш йыжыҥыште ужын да пациентлан тӱрыснек эмлалташ йӧным ыштен кертыт.
М.ИВАНОВА
