Марий Эл вуйлатыше Петербургысо тӱнямбал экономический форумын пашашкыже (14 – 17 июнь) ушнен. Йӱдвел рӱдолаште эртаралтше тиде форум экономике сферыште ик эн кугу мероприятийлан шотлалтеш.
Форум годым Марий Эл вуйлатыше Юрий Зайцев Российын у регионжо дене торгайыме да экономике, науко да технике, социальный да культур сферлаште пашам пырля ыштыме нерген, тыгак республикын электроэнергетический комплексшым вияҥдымашке виктаралтше ойпидышым пеҥгыдемдаш палемден.
Марий Эл вуйлатыше тӱрлӧ площадкылаште федеральный кучемысе да Российыште улшо кугу предприятий-влакын вуйлатышышт дене вашлиеш. Теҥгече, 15 июньышто, Марий Эл вуйлатыше Юрий Зайцев ден Газпром правленийын председательжын алмаштышыже Алексей Белоус пашам пырля ыштыме нерген документеш кидпалыштым пыштеныт.
«Ӱшанле стратегический партнёрын темлыме йӧнан условийже-влак республикыш инвестиций-влакым ушаш, регионышто инновационный проектлам шыҥдараш, промышленностьым, туризмым, ялозанлыкым вияҥдаш полшат», – палемден Юрий Зайцев.
Марий Элын сеҥымашыже-влак да ончыкыжым вияҥме корныжо улмо нерген мый колынам, манын Алексей Белоус да пырля келшен пашам ышташ ямде улмыж нерген каласен:
«Ме республик дене кужу жап шуйнышо вашполышлан ӱшанена да ончыкыжымат полшаш тӱҥалына. Банкын пайдале пунчалже-шамыч, кугу инвестпроектым тӱҥалме годым экспертизым ятыр ийла дене эртарымына да Газпромбанкын шуко тӱрлӧ темлымашыже-влак регионысо экономикын ончык кайымаштыже кугу шӱкалтыш да эҥертыш лийыт. А кызытсе жаплан келшыше розничный услуго радамна еҥ-влакын финанс йодмашыштым шуктышо йӧн-влакым ешара», – рашемден Алексей Белоус.
Петербургысо тӱнямбал экономический форумыш кайыше марий делегацийын программыже моткоч поян. Ятыр мероприятийым палемдыме. Чылажат регионнан экономикыжым вияҥдаш, тӱрлӧ сферыште улшо пӱсӧ йодыш-влакым кораҥдаш полша
Марий Эл Республикым вуйлатышын администрацийжын информаций паша пӧлкажын уверже негызеш Л.СЕМЕНОВА ямдылен
Д.РЕЧКИНЫН фотожо
