УВЕР ЙОГЫН

Чарыме да азап деч арален кодымо

Марий Элыште у коронавирус инфекцийым кондымым да шаркалымым шижтарыме шотышто оперативный штабын 29 апрельыште эртыше черетан заседанийыштыже Роспотребнадзорын Марий Элысе виктемжым вуйлатыше Светлана Булатова палемден: «Регионыштына жапыштыже пуртымо чарымаш-влак калыкым тӱшкан черланыме деч арален кодаш полшеныт».
Инфицироватлалтше-влак коклаште 10 процент йоча, 73 процент пашам ыштен кертше ийготан граждан-влак улыт, 65 ий деч кугурак-шамычын чотышт 16,6 процентыш шуын. Эпидемий тӱҥалме жап гыч 29 апрель марте COVID-2019 дене авалталтме 535 случайым регистрироватлыме. Ты чот гыч 63 случайжым республикыш вес кундем гыч кондымо. Иканаште шуко еҥын черланен кертмыж деч, мутат уке, посна улмо да маскым чийымат сайын полшат.
29 апрельлан 1315 еҥым медицине велым эскерат. Учёт гыч 3954 гражданымм кораҥдыме. Обсерваторышто нигӧ уке. Чылаже 17649 шымлымашым эртарыме.
Тӱҥ задаче-влак кокла гыч С.Булатова май пайрем кечылаште посна улмо режимым, карантиным, системообразующий манме предприятийлаште эпидемий вияҥын кертме деч мероприятий радамым пеҥгыдын шукташ, маскым чияш, медицине пашаеҥ-шамычлан шкем аралыме средствым ситараш кӱлмым палемден.
«Муниципальный образованийлам вуйлатыше-влаклан республикышкына вес кундем гыч толшо-шамычым пеҥгыде контрольышто кучаш темлем. Нунын дене посна улмо режимым шуктымо шотышто мутланаш кӱлеш. Ме тиде ситуаций гын эркын дене лекшаш улына», — ешарен Марий Элын тӱҥ санитарный врачше.
Тазалыкым аралыме министр Марина Панькован мутшо гыч, республикысе шым медицине организацийыште коронавирусан пациент-влаклан 470 койкым шындыме. Эше 30 койкым Сар-влакын ветераныштын госпитальыштышт резерв семын ямдылыме.
«Таче койко фондын 51,2 процентшым айлыме. Республикнан инфекционный стационарлаштыже чылаже 241 еҥ эмлалтеш, ты чот гыч 201 пациент пневмоний дене орлана, 46 черле неле состоянийыште, 182 гражданын тазалыкше «нелылыкын кокла йыжыҥже» семын аклалтеш, латкум пациентын – «нелылыкын куштылго йыжыҥже» семын. Ик черле шодым искусственно вентилироватлыме йӧн дене шӱла, 97 пациентлан кислород кӱлеш. Шкем аралыме средствым, эмым ситышын шапашлыме», — рашемден М.Панькова.
«Ме калыкын илышыж ден эрыкшым аралышаш улына. Элым вуйлатыше Владимир Владимирович Путин палыме формулым ушештарыш: «Кажне гражданинын эрыкше моло еҥын эрыкше дене иземеш. Инфекций дене кучедалме пагытыште тиде формуло лач келшен толеш. Иктаж-кӧ вес семын шона гын, тугеже тудо шке интересшым йырже улшо калыкын деч кӱшкӧ шында да молын эрыкшылан лӱдыкшым ышта. Тыгай эрык шкем гына йӧратыме нерген ойла да изи огыл азапыш пуртен сеҥа», — Россий президентын мутшым эше ик гана ушештарен А.Евстифеев.
 
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
Опубликовать в Одноклассники

Добавить комментарий