«Рӱдӧ Россеть» ден «Рӱдӧ да Юл кундем Россетьыште» корпоратив сынан «Пайдалын ойырлен ыштымаш» онлайн-конкурсын икымше йыжыҥжым иктешленыт да наградым кучыктеныт.
Компаний-влакын пашаеҥышт ден нунын ешыштлан тыгай конкурсшо «Рӱдӧ да Юл кундем Россетьлан» вуйын шогышо «Рӱдо Россетьын» генеральный директоржо Игорь Маковскийын поро тӱҥалтышыж почеш апрельыште стартым налын. Дистанционно эртыше тыгай мероприятий пашам ойырлен ыштыме режимыште улшо-влакым чакемдаш, неле эпидемий условийыште спорт да творчествылан кумылаҥдаш полшышаш.
Онлайн-проектыш ушнаш йодмашым 1000 утла пашаеҥ пуэн. Шкешотан шӱдӧ дене творчестве паша ышталтын: спорт темылан видеоурок, Кугу Сеҥымашын 75-ше идалыкшылан пӧлеклалтше муро да ветеран-влаклан пӧлек, ГОЭЛРО-лан 100 ий темме лӱмеш открытке ден сӱрет-влак.
Паша-влак energopozitiv.ru порталыш пурталтыныт да тушто йӱклымаш икмыняр тылзе шуйнен. Чылаже 500 000, кече еда 5000 деч шагал огыл, еҥ тушко пурен. Конкурсыш ушнышо-влак верч 150 000 утла еҥ йӱклен.
Тыгай конкурсшо да тыгай условийыште икымше гана эртаралтын. Компаний-влакын 12 филиалышт гыч 33 еҥ призёр радамыш логалын. «Воронежэнерго» гыч энергетик-влакын ешышт ик эн чот усталыкым ончыктеныт, тушто 6 еҥ призёр лийын. «Курскэнерго» творчестве марафоным 5 сеҥыше дене мучашлен. «Липецкэнерго», «Нижновэнерго» да «Кировэнерго» филиаллаште кажныж гыч 3 еҥ сеҥен. «Смоленскэнерго», «Белгородэнерго», «Тверьэнерго», «Владимирэнерго», «Ивэнерго», «Калугаэнерго» гыч – 2 еҥ дене, «Удмуртэнерго» гыч – 1 призёр.
Конкурсын самырык участникше-влак, компанийлаште ыштыше-влакын икшывышт, пӧлекым торжественный обстановкышто налыныт. «Рӱдӧ Россетьын» генеральный директоржо Игорь Маковский чыла сеҥышым видеокыл йӧн дене саламлен. Да тыгай форматыште эртыше корпоратив конкурсым умбакыже шуяш кӱлмым палемден.
Ю.ИСАКОВ
