ОБРАЗОВАНИЙ

Француз йылмым шымлена

Эртыше кечылаште Марий кугыжаныш университетыште «Виват, Франций!» республиканский форум латкокымшо гана эртен. Тудым республикысе Образований да наука министерстве, Йошкар-Ола администрацийын образований управленийже, Андре Мальро лӱмеш 26-шо №-ан гимназий, Марий кугыжаныш университет ямдыленыт.

Форумым Марий кугыжаныш университетын ректоржo М.Швецов почын. Тудо француз йылмын кӱлешлыкше да лишыл тунемме ийлаште Марий кугыжаныш университетыште французла кутырышо студент-влак ешералт толмышт нерген ойлен. Тыгак Марий образований институтын шанче йодыш шотышто проректоржо С.Охотникова, форумын тӱҥ организаторжо, медицине факультетыште пашам ыштыше, педагогике науко кандидат, доцент Ф.Хабибуллина саламленыт.

Тиде мероприятий Марий Элын опорный вузшо да межкультурный компетенций направлений дене пашам ыштыше республикысе туныктымо тєнеж-влак коклаште пеҥгыде кылым ышта. Вет форумышто республикысе школа гыч туныктышо ден тунемше, Марий кугыжаныш университетын преподавательже да тӱрлӧ элла гыч шинчымашым погаш толшо, французла кутырышо студент-влак лийыныт.

Форумышто латшым секций пашам ыштен, 180 еҥ доклад да презентаций дене выступатлен. Лончылымо йодыш-влак Россий-Франций-Марий Эл тематике дене кылдалтыныт, нуно искусство, литератур, лингвистика, лингвокультурологий, биологий, спорт, медицина аспект-влак йыр чумыргеныт.

Тиддеч посна «Современный образованийысе межкультурный компетенцийын йодышыжо» лӱман йыргешке ӱстел, руш да йот йылме-влак дене возымо произведений негызеш ямдылыме сочинений конкурс эртеныт. Форумым XXIX француз муро фестиваль мучашлен. Лауреат-влак Марий Эл образований да науко министерствын грамотшо дене палемдалтыныт.

Ф.Хабибуллина, педагогике шанче кандидат,

МарГУ-н доцентше.

И.Иванова, филологий шанче кандидат,

МарГУ-н доцентше.

Опубликовать в Одноклассники

Добавить комментарий