Кодшо кечылаште Параньга сымыктыш школыш музыкальный у семӱзгар-влакым конденыт, увертара республикын Тӱвыра, савыктыш да калык паша шотышто министерствыжын пресс-службыжо.
Тидым ышташ «Тӱвыра» национальный проект полшен. Тиде школышто моло тунемме вер семынак дистанционно тунемыт. Туге гынат йоча-влак у семӱзгарым шоктен онченыт, йоҥгалтмыжым акленыт. А кумытын йоча сымыктыш школласе икшыве-влаклан эртаралтше конкурсышто дистанционно мастарлыкыштым тергеныт да сеҥыше радамыш лектыныт.
Май мучаште ты сымыктыш школыш эше кок баяным кондышаш улыт.
Тиддеч посна райрӱдысӧ тӱвыра ден каныме рӱдерын материально-технический базыжым уэмдаш йӧн лийын. Шонымашым илышыш шыҥдараш «Единая Россия» партийын «Культура малой родины» проектше полшен. Тудын дене келшышын, рӱдерлан йӱк оборудованиым налме.
А.БАЙКОВА
