Элыштына, республикыштына коронавирус инфекций шарлымылан кӧра культур учреждений-влакын дистанционно режимыш куснымо нерген газетыштына возенна ыле. Туге гынат театр коллектив-влак яра огыт шинче, тӱрлӧ йодышым рашемдат, ончышышт-влакым куандараш манын, у спектакль-влакым ямдылат. Мутлан, М.Шкетан лӱмеш Марий национальный театрыште мо дене ӧрыктараш вашка? Тидын нерген театрын тӱҥ режиссёржо Роман Алексеев дене мутланышна.
— Роман Юрьевич, артист-влак кызыт мӧҥгыштышт улыт. Дистанционно манме йӧн дене пашам ышташ куштылгыжак огыл, очыни?
— Мутат уке, тыгай йӧн дене пашам ышташ, лекше йодышым каҥашаш куштылго огыл, вет кеч-могай тӱшка пашаште икте-весе дене шинчаш ончен кутырыман, но илыш йодмо почеш ме чылалан тунем шуына.
— Могай у спектакль-влакым сценыш лукташ ямдыледа?
— Театрыште икмыняр режиссер улына. Ме кажныже могай-гынат спектакльым ямдылена. Василий Александрович Пектеев Островскийын «Снегурочка» пьесыж почеш тыгаяк лӱман спектакльым рушла ямдыла. А Василий Валерианович Домрачев Володя Матвеевын пьесыж почеш «Ава капитал» спектакльым ямдыла.
— Ӱжмӧ режиссёр-влакат тыршат докан?
— Туге, теве Светлана Акчурина театр тургым мучаште Владимир Гуркинын пьесыж почеш «Еҥ марий – вот марий» спектакльым лукшаш ыле, но пандемийлан кӧра изиш варалан кодымо. Тыгак тиде кечылаште Степан Пектеев марий йомак негызеш спектакльым ямдылаш тӱҥалын.
— А Те, Роман Юрьевич, могай пьесе дене пашам ыштеда?
— Лишыл жапыште Зинаида Долгован пьесыжым артист-влак дене лудаш тӱҥалнена. Пьесе «Шым пуд пырче» маналтеш, а жанр шотышто — йомаклан келыштарен илыш нерген шонкалымаш. Кызыт автор произведенийжым изишак тӧрла, а вара пашалан пижына веле.
— Пеш кугу тау йодышем-влаклан вашештымыланда.
— Тыландат тау!
А.БАЙКОВА
