29 ноябрьыште М.Шкетан лӱмеш Марий национальный драме театр шочмо кечыжым ойыртемалтшын палемден.
Тиде кастене сценыште 900-шӧ гана модмо «Салика» спектакльым икымше гана интернетыште вияш эфирыште мланде шарын кеч-могай кундемыштыже ончен кертыныт.
Тӱня мучко пандемий озаланыме жапыште культур учреждений-влак пашам ыштыме у йӧным кычалаш тӱҥалыныт. М.Шкетан лӱмеш театрна тидын шотышто поснак чолган тырша манаш лиеш. Шошым карантиным увертарымек, режиссер-влак репетицийым онлайн дене эртарышт. Тыге, шыжым у тургым почылтмеке, вигак кум у спектакльым калыклан ончаш темлышт. Мӧҥгыштӧ шинчыме жапыште калык тыгак соцкылыш лукмо икмыняр спектакльын видеоверсийжым кумылын ончен.
А У ийлан Шкетан театр ончышылан адакат пӧлекым ямдылен.
3 январьыште уло кумылын театрыш «Сӧсна поминка» весела комедийым ончаш ӱжына. Кӧ Йошкар-Ола деч тораште да Марий Элже дечат ӧрдыжтӧ ила – тудат ончышо радамыш ушнен кертеш. Ты кастене Моско жап дене 16 шагатлан спектакльым адакат интернетыште вияш эфирыште ончаш лиеш. Шкетанын мыскара ойлымашыж гыч Васлий пазарыш шыл ужалаш коштмыж дене могай туткарыш логалын – ончашак кӱлеш. Уке гын йӧратыме артистда Андрей Бусыгинын геройжо гаяк тачат йолым шуялтен возаш лиеш. А Опой кува гайже кажне ялыште лектыт. Кушто сӧсна але айдемым пытартыш корныш ужатыме поминка – вученак веле коштыт…
Тыгак 5 январьыште моткоч сылне У ий пайрем концертым вияш эфирыш луктына. Ончалза, лӱмжак могай оҥай: «У ий касын томаша: Настачий але Марпа». Кӧ нуно улыт, молан ӱдыр-влакым тавалат?.. Ончена тугеже!?
Мемнан дене пырля лияш улыжат shketan.ru адрес дене театрын сайтышкыже пураш да билетым налаш кӱлеш.
Пагалыме йолташ-влак! Чыладамат У ий пайрем дене шокшын-шокшын саламлена. Тек чыла осалже да нелыже эртыше иеш кодеш. 2021 ийым айста волгыдо ончыкылыклан ӱшан дене вашлийына. Таза, пиалан да Шкетан театр дене пырля лийза.
С.Белкова,
театрын сылнымут пӧлкажым вуйлатыше
