20 мартыште В.М. Васильев лӱмеш Йылмым, сылнымутым да историйым шымлыше марий институтышто Марий Эл Правительстве вуйлатышын икымше алмаштышыже, тӱвыра, печать да калык-влакын пашашт шотышто министр М.Васютин коллективым у вуйлатыше дене палымым ыштен.
Марий Эл вуйлатыше Л.Маркеловын 17 мартысе 106-р кӱштымашыж почеш МарНИИЯЛИ-н у вуйлатышыжлан историй науко кандидат Евгений Петрович Кузьминым официально шогалтеныт. Е.Кузьмин йӱклымаште эн шуко йӱкым поген.
Вашлиймаште Михаил Зиновьевич тачысе кӱкшӧ технологиян пагытыште наукын илыш дене тӧр ошкылаш кӱлмыжым палемден, тыгак институтын ончычсо директоржо А.Казимовлан да директорын сомылжым шуктышо Л.Григорьевалан туумутым каласен. А МарНИИЯЛИ-н у вуйлатышыже Е.Кузьмин пырля умылен пашам ышташ тӱҥалме нерген ӱшандарен каласен.
Л.ШАБДАРОВА.
