УВЕР ЙОГЫН

Тыгайже Звениговышто гына

20 январьыште Марий Элым вуйлатыше Александр Евстифеев Звенигово олаште Калыклан социальный услугым пуымо комплексым торжественно почын.
Звенигово районысо Калыкым социально обслуживатлыме да Калыклан социальный полышым пуымо рӱдер-влакым Россий Рӱдӧ банкын Юл-Виче тӱҥ виктемжын Марий Элысе Национальный банкшын пӧлкаж деч кодшо кок тӱжем квадрат метр кумдыкан кок пачашан уэмдыме йоҥгыдо зданийышкыже кусарыме. Техникым шындыме, калыкым кызытсе жаплан келшышын обслуживатлыме да услугым пуымо кугыт шот дене республикыштына тыгай комплекс тетла уке. Зданийым тичмашнек олмыктымо, кумдыкымат тӱзатыме. Пурымаште подъёмникым шындыме. Олмыктымо да чоҥымо пашалан чылаже 5,3 млн. теҥгем кучылтмо, эше 2 млн. утла теҥгелан мебель ден оборудованийым налме.
Республикын калык илышым вияҥдыме шотышто министрже Марина Островскаян мутшо почеш, кок рӱдерым ик зданийыш таклан огыл вераҥдыме – чылажымат калыклан йӧнан лийже манын ыштыме, адакше комплексым тӱрлӧ ийготан, социальный положениян да тазалыкан еҥ-влаклан келыштараш тыршыме. Социальный услугым налаш толшо-шамыч шочшыштым йоча пӧлемыште специалистлан коден кертыт. Комплексыште тыгак логопед, психолог, социальный реабилитаций шотышто специалист улыт.
Марий Элым вуйлатыше сенсор пӧлемым, «ик окна» манме йӧн дене пашам ыштыше документым налме зоным, йоҥгыдо да йӧнан холлым ончен, пайдаланыме оборудованийын ден техникын пашашт нерген йодыштын.
Ойыртемалтын вияҥше да неле илыш ситуацийыш логалше еш гыч йоча-влакым «Нескучный сад» социальный технопаркыште лабиринт, мобильный конструктор, бизиборд, интерактивный скалодром вучат.
Льготан категорийыш пурышо еҥ-влаклан услугым яра пуаш тӱҥалыт. Кумылан-шамычлан йочам ончымо, интеллектуально вияҥдыме, консультироватлыме, психологын полышыж дене тӧрлатыме шотышто тӱлыман услугым темлат.
Кугурак тукымлан поснак кугу тӱткышым ойырымо — Калыкым социально обслуживатлыме рӱдерыште сулен налме канышыш лекше-влакын кумылышт почеш усталык, спорт, куандарыме шотан моло мероприятий эртаралташ тӱҥалыт.
А.Евстифеев помещений-влакым пайдалын кучылташ йӧршым ыштымым палемден.
Тиде оралтыш тыгак Марий аварий-утарыше службын Звенигово аварий-утарыше группыжо куснен. Тудын ончычсо зданийже пеш йӧндымӧ лийын. У верыште шокшо гараж, дежурный сменылан пӧлем, медкабинет, тунемме класс, кочмывер, санузел, оборудований ден инвентарьым аралыме склад-влак улыт.
Оборудоватлыме помещенийыш куснымо дене телым азап лийме верыш кӱчык жапыште лектын кудалаш ынде палынак йӧнан, палемден регионым вуйлатыше.
Марий Эл Гражданский обороно да калыкым аралыме комитетын председательже Владимир Карповын каласкалымыж гыч, эртыше ийын регионысо аварий-утарыше подразделений-влаклан у технике ден оборудованийым налме: Козьмодемьянск группылан – аэропушым, Кокшайск группылан – кызытсе жаплан келшыше аварий-утарыме автомобильым да эше 4 комплект аварий-утарыме ӱзгарым. Тидлан Марий Элым вуйлатышын распоряженийже почеш ойырымо 7 млн. теҥгем кучылтмо.
«Техникым ончыкыжымат уэмдаш тӱҥалына. Ойлашат намыс, но эртыше ийлан налмаште службын технический средствыжым 80 процентлан кучылтмо. Чрезвычайный ситуацийыште пайдаланаш кӱлмӧ годым тудо пудыргенат кертеш. Чыла тидым йыжыҥын-йыжыҥын шотыш кондена», — палемден А.Евстифеев.
Марий Элым вуйлатыше Россий Рӱдӧ банкын Юл-Виче тӱҥ виктемжын Марий Элысе Национальный банкшын пӧлкажлан палемдыме зданийым чылт яра пуымыжлан тауштен да тидым банк структур ден кучем органын Звенигово районысо калыкын сай илышыж верч тыршыме поро паша кылын примерышт семын палемден.

Марий Элым вуйлатышын организаций да

аналитике виктемжын уверже негызеш

М.ИВАНОВА ямдылен

Опубликовать в Одноклассники

Добавить комментарий