УВЕР ЙОГЫН

У книга: Историйыште кугу кышам кода

22 февральыште Шочмо элым аралыше-влакын кечышт вашеш  Конгресс полатыште «Защитники России-генералы Земли Марийской» книга-альбомын презентацийже лийын. 

Тиде изданий лудшо-влакым Граждан да Кугу Отечественный сарлаште тӱрлӧ жапыште тӱрлӧ элысе военный конфликтлаште лийше генерал-земляк, тыгак  Марий Эл дене кылдалтше генерал-влакын биографийышт дене палдара. Кажныжын илыш корныжо портрет дене пеҥгыдемдалтын.

104 страницыште тӱрлӧ подразделенийлаште:  МВД-ште, ФСБ-ште, ВМФ-што, Кутузов орденан Киевско-Житомирский ракетный дивизийыште да моло службылаште лийше 87 генерал дене палдарыме.

Республик вуйлатыше А.Евстифеев чылаштым, тыгак толшо уна-влакым, шокшын саламлыш.

– Мыланем тыгай книга-альбомым презентоватлыме амал дене  вашлияш – куан. Моткоч кӱлешан альбом. Генерал тиде званийым шке уш-акылже  пеҥгыде койыш-шоктышыжо, физический ямдылалтмыже, сеҥен моштымыж дене сулен налын. Лач тыгай еҥ-влаклан тиде книга пӧлеклалтын. Генерал-влак дене республикна кугешнен кертеш. Теве тыге мыланна Россий державылан  вияҥашыже полшышо, Отечествым аралыше-влак дене лишкырак палыме лияш йӧн пуалтеш. Илен-толын, тиде книга историйыште кугу кышам кодышо лиеш, – палемден Марий Эл вуйлатыше А.Евстифеев. – Тыгай кӱлешан книга-альбомым лукмаште тыршыше автор Аркадий Максимович Курочкинлан тау. 

Шарнымаш альбомым А.Евстифеевын кидше гыч презентацийыште улшо генерал-влак, нунын родо-тукымышт налыныт. 

Е.Эшкинина.

Опубликовать в Одноклассники

Добавить комментарий