Марий Элыште Общероссийский калык фронтын чолга еҥже-влак Медведево район администрацийыш Знаменский поселкышто верланыше школ воктенысе корно ушнымашым шотыш кондаш йодмаш дене лектыныт.
Тушто, Первомайский ден Сеҥымаш урем-влак ушнымаште, йолешке-влаклан вончашышт келыштарыме вер уке. А вет тышеч кажне кечын ятыр еҥ эрта. Автомобилист-шамычлан тӱткырак лияш темлыше лач «Внимание, дети!» знак гына кеча.
Общественник-шамычлан тыште илыше-влак поселкын писын чоҥалтмыж нерген каласкаленыт. Пытартыш вич ий жапыште гына у микрорайонышто шуко пачеран лу утла пӧрт ден йочасад ышталтыныт. Сандене шуко икшыве ден кугыеҥ-влакланат тиде корно ужашым кажне гана лӱдын-лӱдын эрташышт логалеш.
— Тушто йолешке-влаклан вончаш вер такше уло, но тудо тораште верланен. Адакшым школ ваштарешак общественный транспорт остановко уло. Сандене пычкемыш годым тыште кошташ поснак лӱдыкшӧ. Але вара кучем ты пашашке ушныжо манын, корнышто туткар лиймым вучыман? – каласен Марий Элыште ОНФ-ын активистше Евгений Калинкин.
Общественник-шамыч Медведево район администаций вуйлатышым тиде корно ужаш лӱдыкшыдымӧ лийже манын кӱлеш мерым кӱчык жапыште ышташ йодыныт.
Л.КАМАЛЕТДИНОВА
