УВЕР ЙОГЫН

Йоча пагыт ден сар пырля эртеныт

Тиде книгасе кажне корнышто, мутышто сар пагытыште шочшо икшывын йӱкшӧ солна. Тудо чоным ишыше, шинчвӱдым лукшо…

«Вместе были детство и война» книгаште — Шернур район Кукнур ял шотан илем кумдыкышто 1927 ий 19 октябрь гыч 1945 ий 3 сентябрь марте шочшо 109  еҥын пӱрымашыже. Таче нуно чыланат 74 ияш деч кугурак улыт. Кугу Отечественный сарын ветеранже-влак веле огыл, тунамсе икшыве-шамычат шагалрак да шагалрак кодыт. Книгам савыктен лукмо жаплан нунын кокла гы кандашынже илыш дене чеверласен.

 Кажне шарнымашым лудмо годым умылет: тиде шукертак палыме кинофильм гыч сюжет але действий огыл, а шочмо кундемысе родын, пошкудын, палымын йоча пагытше, илыш корныжо.

«Вместе были детство и война» проект Шернур районышто 2017 ий гыч илышыш шыҥдаралтеш. Марисоласе-влакын деч вара тиде – кокымшо книга. Презентаций февральыште эн ончычак Кукнур кыдалаш школышто эртен. Актовый залыш 191 йоча да туныктышо-влак чумыргеныт ыле. Проектын авторжо, районысо ветеран-влак советым вуйлатыше, книган редакторжо Зинаида Зорина районын историйыштыже шучко сарын кышаж нерген чон вургыж каласкален. Книган вес редакторжо Валерий Мочаев коча-кова-влакын кочо пӱрымашышт нерген ушештарен, ты поро пашаш ушнышо-влакым суапыштым пеҥгыдемден тауштен. Книгалан материалым Кукнур библиотеке вуйлатыше М.Четкареван вуйлатымыж почеш, верысе ял шотан илем кумдыкышто илыше, ветеран-влак советын еҥже, кыдалаш школын тунемшыже ден туныктышыжо-влак погеныт. Ты пашаш ушнышо кажне тунемшылан уло школ коллектив ончылно книгам кучыктышт.

Тиде кечынак кечывал деч вара Кукнур культур да каныме пӧртыштӧ эшеат кугу пайрем эртыш: книга презентаций, район вуйлатыше-влакын калык дене вашлиймашышт, Кугу Отечественный сарын да тылын ветеранышт-влаклан шарнымаш медальым кучыктымаш.. Залыште книган геройжо шкештат шинченыт. Кажныжым сценыш луктын, посна тауштен, книгам кучыктеныт. А калыкше кузе нуным кид совен вашлийын?! Южыжын лӱмжым ойлымеке, кынелын шогалше лийын огыл. Тунам, шукерте огыл илыш гыч каен манмым колмеке, шӱлык авалтен. Теве тудо тат – илышлан ак: шукерте огыл айдеме пӱрымашыж каласкален, а таче тудын нерген книгаште гына лудын кертына.

Тиде проект – калык вий дене ыштыме проект, молан манаш гын тудым чумырышыжат, савыктен лукташ окса надырым пуышыжат – калык.Тушко ындыжым районысо чыла ял шотан илем, поселко ушненыт. Эртыше кечылаште Шернур районын Ким Васин лӱмеш рӱдӧ библиотекыштыже Кукнурысо книгам лукшо-шамыч дене ваш мутланымаш эртен. Нуно ятыр йодышлан вашештеныт. Лишыл жапыште Казанский ял шотан илем дене кылдалтше тыгаяк книгам ямдылен шуктышаш улыт. Моло кундемат жапым шуйкалыде  ушнат гын, шарнымаш книга «нугыдырак» лиеш.  

С.ПЕХМЕТОВА

Авторын фотожо

Опубликовать в Одноклассники

Добавить комментарий