УВЕР ЙОГЫН

Туризм: Эше ик маршрутым почмо

 Юрино тӱвыра пӧрт пелен туристический бюром почмо нерген возенна ыле. А шукерте огыл тудын пашаеҥже-влак ты кундемыш толшо турист-шамычлан у маршрутым ямдыленыт. Тудо тыгак маналтеш: «Один день в глубинке». 

Турым ямдылыше-влакын шонымышт почеш, поснак кугурак олалаште илыше-влаклан тудо келшен толшаш. Ик кечылан тыглай ялысе илыш дене илен ончаш, каналташ да шкалан шуко уым пален налаш йӧным ыштат. А тидлан нуно Василевский селам ойырен налыныт. Сылне пӱртӱс, мотор вер-шӧр турист-влакын кумылыштым налшаш улыт. А шып ялын икшырымын кайыше илышыже чоныштым лыпландарышаш. Турист-влак тудын историйже, тысе калыкын илышыже дене палыме лийыт. Уэмден олмыктымо черкыш пурен лектыт да тыгак кумылым нӧлтышӧ фольклор программым ончат.

Тыгак руш калык илыш дене палдарыше ончерыште лийыт. Тудыжо чодыра промышленник Черемухинын пӧртыштыжо вераҥын. Тушто ял илыш дене палдарыше этнографий экспонат-влакым чумырымо. Ялысе тӱвыра пӧртышто турист-влакым шудо дене шолтымо чай, коҥгаште кӱктен лукмо когыльо дене сийлат.

 С.Носова.

Опубликовать в Одноклассники

Добавить комментарий