ПЕНСИЙ

Пенсий шумлык: Сай велжат уло

Пенсий ийготым кӱзыктымӧ дене пенсионер ден пашам ыштыше-влак кокласе дисбаланс пыта манын шонем. Пенсийыш лекме ийготым вашталтыде огешак лий. Элысе чумыр калык гыч кумшо ужашыже пенсийыште лиеш гын, пенсионер-влакын илышыштым саемдаш неле. Пенсий законодательствым вашталтыме дене социальный да экономический нелылыкым сеҥен лекташ йӧн утларак лиеш. Адакше тудын сай велжат уло: пенсий кӱза, пенсионер-влакын илышышт саемеш, ӱмырышт шуйна, пашам ышташышт йӧн лектеш. Вет чыланжак огыл, йӧратыме коллективым коден, паша гыч каяш кумылан улыт.

Пенсий ийготым вашталтыме дене пашам пуышо-влаклан 50 ияш-шамычым производство гыч «темден лукташ» кӱлешыже огеш лий. Мӧҥгешла, профессиональный формын кӱкшытыштыжӧ улшо-влакым угыч туныкташ кумылышт лектеш. Пенсийыш эр лекмылан кӧра кугужак огыл пенсийым налше-влак йочашт ден уныкаштлан йӧндымыш савырнат, вет профессиональный карьерын эн сай йыжыҥышкыже шушо шагал огыл самырык специалист шкан йол ӱмбаке пеҥгыдын шогалме олмеш ача-аважлан, лишыл родыжлан окса дене полша.

А кызытсе пенсионерлан у системе пайдам гына кондышаш, вет пенсийым идалыкыште 1000 теҥге марте кӱзыкташ сӧрат.

М.ГАЛЯУТДИНОВ, «Единый Российын Самырык гвардийже» всероссийский мер организацийын Марий регионысо пӧлкажым вуйлатышын пашажым жаплан шуктышо.

Опубликовать в Одноклассники

Добавить комментарий