«Россий Федерацийысе финн-угор калык-влакын ассоциацийышт» мер толкын Калык-влак дене пашам ыштыме шотышто федерал агентстве полшымо дене эртарыме «1941-1945 ийласе Кугу Отечественный сарыште Российысе финн-угор калык-влакын талешкышт» конкурсышт иктешлалтын. «Шочмо тӱвыра да сар» номинацийыште 2-шо верым Марий Элысе Советский район Кельмаксола ялыште илыше историк-краевед Леонид Киртаев сеҥен налын.
Тидын нерген эртыше кечылаште «1941-1945 ийласе Кугу Отечественный сарыште Российысе финн-угор калык-влакын талешкышт» книга (1500 экземплярым савыктыме) презентаций годым увертареныт. Тудым «Россий Федерацийысе финн-угор калык-влакын ассоциацийышт» общероссийский мер толкынын председательже П.Тултаев почын.
Чылаже конкурсыш элнан 32 регионжо гыч 241 йодмаш пурен, тышеч тиде книгаш 109 пашам пуртымо – 21-же марий мландын геройжо-шамыч нерген. Марий Эл гыч конкурсыш тыгак И.Букетова, А.Глазырина, А.Курочкин да молат ушненыт.
Г.КОЖЕВНИКОВА
