Теҥгече 17 шагат гутлаште Кундыштӱр психоневрологический интернатын ик пачашан корпусшо пелен чоҥымо монча-прачечный комплексышкыже тул пижын.
Пожар-утарыше подразделенийын толмешкыже, интернатын пашаеҥже-шамыч обслуживатлыме 81 еҥым лӱдыкшыдымӧ верышке шке вийышт дене кусареныт. Тыгеже тиде тӧнежыште социальный услугым налше 250 гражданин ила. Пожарыште нигӧланат зиян лийын огыл. Тулым пожарный часть йӧртен. Кызыт тудын пижме амалжым рашемдат.
Тиде азапыште интернатыште пашам ыштыше-влаклан пожар-тактике тренировко ден тунеммашым пырля эртымышт сайын полшен. Нуно умбакыже шарлен кертше тулым айдеме илышым йомдарыде чарен шогалтен кертыныт, тыгак тӧнежын погыж ден оборудованийжым, социальный услугым налше-шамычын арверыштым арален коденыт.
Кызыт интернатыште илыше чыла еҥым келыштарен оборудоватлыме пошкудо корпусыш вераҥдыме. Нунылан мо кӱлешым чыла ситарыме. Тӧнеж ончычсо штат радам денак умбакыже пашам ышта. Лишыл жапыште монча-прачечный комплексым олмыкташ тӱҥалыт. Тидлан Марий Эл правительствын резерв фондшо гыч средствам ойырат.
Корпусым олмыктымо жапыште тыште илыше-влакым вес интернатыш кусарен кертыт. Тидлан вер ситышын, социальный обслуживанийын организацийже-влак социальный услугым налше-влакым вашлияш ямде улыт.
М.ИВАНОВА
