1 июнь – Йоча-влакым аралыме тӱнямбал кече. Тидым шотыш налын, таче ме икмыняр еҥлан тыгай йодышым пуэнна: ты кечым кузе палемдеда? Икшывыдам кузе да мо дене куандареда? Тиде пайремым палемдымаш ешыштыда йӱлашке савырнен мо?
Володя Матвеев, Марий Эл радион тӱҥ редакторжо:
– 1 июньым палемдымаш ешыштына йӱлашке савырнен манашыжак огеш лий. Туге гынат ме тиде кечын йоча дене иктаж-кушко лектын кошташак тыршена: модмо паркыш миен толына але кафеште чылан пырля шинчена. Ӱдырна гимнастике дене заниматла, англичан йылмым тунемеш, сандене тений тунемме ийым мучашлыме годым 2 июньышто гимнастике дене выступленийже лиеш. Ты амал дене 1 июньышто тидлан чотак ямдылалташ тӱҥалыт. Англичан йылме дене иктешлымашышт изиш варарак лиеш. Но ме садак йочанам куандараш тыршена. Да идалыкыште ик кечын 1 июньышто веле огыл. Мутлан, ешыштына вес шкешотан йӱлана уло: арнялан ик гана чылан пырля кушко-гынат миен толына. Амира кушко наҥгая, тушко каена, мутлан, «Фиеста паркыш», «Додо пиццыш», иктаж вес кафешке, модмо паркыш. Тиде мемнан, рушла ойлаш гын, стабильно!
Ирина Степанова, «Кугарня» газетын тӱҥ редакторжо:
– Икымше июнь кечым ме тыгеже огына пайремле, молан манаш гын утларакшым паша кечылан логалеш.
Йоча-влакым аралыме кече идалыкыште ик кече гына лийшаш огыл. Тиде кажне кечын лийшаш. Ме гын ача-ава семын икшывынам эре араленак шогена. Йӧн лийме семын ӱдырнам куандараш тыршена: тудлан мо кӱлмым налын пуэна, тӱрлӧ вере канаш, тыгак зоопаркыш, аквапаркыш, бассейныш, экскурсийыш коштына. Санденак йоча годым пайрем икымше июньышто веле огыл, а кажне кечын лийшаш, вет тиде пагыт курым-курымешлан шарналт кодеш. Изиж годым икшыве илышыште тӱрлӧ нелылыкым шижшаш огыл. Мый шке йоча жапем шарналтем, тудо моткоч весела, йомак жап гай чучеш. Икшывынат ончыкыжым тиде жапшым куан дене гына шарналтыже манын шонем.
Владимир Аптулаев, амалкалче:
– Йоча-влакым аралыме кечым ме ала-кузе посна чотак ойыртемалтшын эртарена манын каласен ом керт. Но садак тиде кечын йоча-шамычлан кугурак тӱткышым ойыраш тыршена, вет идалыкыште тиде ик кече, кунам йоча-влак шкеныштын кӱлешлыкыштым шижшаш, ача-аван йӧратымашыштым палышаш, умылышаш улыт. Садлан тиде кечын ме икшыве-шамыч дене пырля иктаж-кушко лекташак тыршена. Икана, мутлан, еш дене чумырген колым кучаш миенна ыле. Южо ганаже йоча каныме рӱдерыш лектын пурена. Тушто нуно шер теммешкышт канат. Тиде кечынак йоча кевытыш пурен лектына. Тушто икшывына-влак шканышт келшыше, кӱлешан модышым але арверым, молым ойырен налыт. А кастене ме нуным могай-гынат тамле кочкыш дене сийлаш тыршена. Южгунам авашт иктаж-мом тамлым кӱэштеш, роллым але пиццым, але эше иктаж-мом весым налына.
Чылаштымат тиде кече дене шокшын-шокшын саламлем. Тек йоча-влак, а йоча – тиде илышын пеледышыже, эреак пеледалт шогат.
Валентина Никонова, кум шочшан ава, ургызо:
– Икымше июньым палемдымаш ешыштына йӱлашке савырнен манашат лиеш, вет тиде кечым кажне ийын пайремлена. Ме эреак шӱжарем-шамыч дене икшывына-влак дене пырля, а ме ныл акак-шӱжарак улына, погынена да кечывалым Йошкар-Оласе рӱдӧ каныме паркыш каена. Тушто нуным тӱрлӧ аттракционыш пуртен луктына, тыгак батутышто тӧрштылыт, кафеште пырля шинчена. Эшежым ме Йошкар-Олаште шке пӧртыштӧ илена, сандене эреак манме гай мемнан дене чылан пырля погынен, шашлыкым жаритлена. А каслан кажне гана тортым налына да ешна дене чылан пырля погынен кочкына.
Мый кок кече коден пашам ыштем, сандене ӱмаште, мутлан, каен кертын омылат, кугурак ӱдырна Валерия шольыж ден шӱжарже-влакым паркыш коштыктен.
Тений ялыште илыше кокамын йыргешке лӱмгечыже лиеш. Шочмо кечыже 28 майыште лийын гынат, 1 июньышто, шуматкечын, эртара. А мый тиде кечын пашам ыштем да каен ом керт. Пелашем, икшывына-шамыч тушто лийыт. Кечывалымже гын верысе книгагудышто ыштыше шӱжарем 1 июнь пайрем вашеш икшыве-влаклан «Дочки-сыночки» модыш программым эртара. Тушко мемнан йочана-шамычат, Максим ден Ксения, миен толыт докан.
Любовь Камалетдинова
Фотом соцкыл лаштык гыч налме
