Йошкар-Оласе Ремзавод микрорайонышто у черке чоҥалтеш. Эртыше кечылаште Йошкар-Ола да Марий митрополит Иоанн тудлан негызым пыштыме годым юмын шӱлышым пуртымо йӱлам эртарен.
У черке Йошкар-Оласе эмлымвер воктене, Зоя Космодемьянская уремыште, ,верланаш тӱҥалеш. Тудын настоятельжылан иерей Михаил Горицкий ышта. У храм Иверский Юмынаван юмоҥаже лӱмеш лиеш. Негызшым пыштыме годым тушко Палестинысе преподобномученник-влакын мощыштым вераҥденыт.
Каласен кодыман: ончыкылык храм олмышто кызыт тугакат изи пу храм уло. Индешлымше ийла тӱҥалтыште оласе больницыште эмлалтше-влаклан кумалашышт лӱмын пӧлемым келыштареныт улмаш. Вара олмешыже эмлымвер воктенак изи черкым нӧлтеныт. 1996 ий кеҥежым официально приходым регистрироватленыт. Тушто оласе священник-влак черет дене кумалтышым эртараш тӱҥалыныт. Кызытат шуматкече, рушарня да черке пайрем еда тӱшкан кумалыт. Черкыш коштшо калыкат койын ешаралтеш. Теве ынде тудлан кермыч гыч оралтым чоҥаш тӱҥалыныт. Кызытеш пырдыжым нӧлтеныт…
С.Носова.
Снимкыште: у черкын негызше.
