«Браво!», «Божественно!», «Супер!» — тыгай шомак-влак йоҥгат Э.Сапаев лӱмеш опер да балет академический театрыште эртыше орган концерт жапыште. Орган — ойыртемалтше семӱзгар. Республикнан рӱдолаштыже илыше-влак тудым икымше гана 2014 ийыште театрын у полатыштыже ужыныт да тунамак йӱкшым колыныт. Тиддеч вара тыгай концертыш калык эреак зал тич погына.
Театрыш органым вераҥдаш Марий мландыште шочын-кушшо, Озаҥысе Н.Жиганов лӱмеш консерваторийын ректоржо, музыкант Рубин Абдуллинын шонымашыже лийын. Рубин Кабирович ынде ятыр ий Татарстаныште ила, пашам ышта гынат, шке шочмо кундемыштыже тӱвырам вияҥдымаште тырша. Тудын полшымыж денак театрыште орган кажне толшым ӧрыктара. Кызыт ты семӱзгарым шоктышыжат тудынак тунемшыже улыт.
Землякнан тунемшыже кундемнам чапландара
Арсений Ушков ден Антонина Воронина Э.Сапаев лӱмеш опер да балет театрын у полатше почылтмеке, тушто пашам ышташ тӱҥалыныт. Вате-марий коктынат органым шоктат.
Арсений Ульяновскышто шочын-кушкын. Тудын аваже фортепьяном шоктен, сандене эргыжымат музыкальный школыш тунемаш колтен. Тыгодымак рвезе физике да математике направлений дене лицейыште тунемын.
— Кок школжымат иканаште тунем лектынам. Но илышем садак искусство дене кылдаш шоненам, сандене Ульяновскысо музыкальный училищыш тунемаш пуренам, — йоча да студент пагытшым шарналта Арсений.
Тиддеч вара рвезе Озаҥысе кугыжаныш консерваторийысе «фортепьяно» пӧлкаште шинчымашым нылынам. Нылымше курсышто тунеммем годым педагог мыйым «орган» пӧлкаш кусарен. Изиш ӧрынамат ыле. Занятийым консерваторийын ректоржо Рубин Кабирович шкеже вӱден. Лач тудак самырык еҥлан Йошкар-Олаште у театрыште органым вераҥдыме нерген ойлен.
Тыгай вашлиймаш Арсенийлан пӱрымашыжым рашемдаш полшен. Тыге Арсений ден Антонина Йошкар-Олашке илаш кусненыт…
А.Байкова
!!! УМБАКЫЖЕ МАТЕРИАЛЫМ «МАРИЙ ЭЛ» ГАЗЕТЫШТЕ ЛУДАШ ТЕМЛЕНА!!!
