24 майыште Марий Элым вуйлатыше Александр Евстифеев Коррупций ваштареш кучедалме шотышто комиссийын заседанийжым эртарен.
Тушто кодшо ийыште кугыжаныш орган ден верысе самоуправлений орган-влакын нормативно-правовой актыштлан антикоррупционный экспертизым эртарыме результат нерген, тыгак муниципальный образований-влакын администрацийыштышт коррупций ваштареш кучедалме пашам виктарен колтымо да тиде пашан лектышыж нерген мутланыме. Заседанийыште лийше-влак тыгак 2018 ийыште коррупций шотан преступленийым ыштымым пален налме, тыгай пашам ышташ корным петырыме да лийшыжым тӱжвак лукмо пашан лектышыжым онченыт.
Элкєргє политике, верысе самоуправленийым вияҥдыме да юстиций шотышто министр Михаил Даниловын увертарымыж почеш, кодшо ийыште Марий Эл Республикын законжо, республикым вуйлатышын указше, Правительствын пунчалже-влакын 680 проектыштлан антикоррупционный экспертизым эртарыме.
Марий Эл Республикын исполнительный кучем органже-влакын 836 нормативный правовой актышт гына экспертизым эртен, 54 актыште (6%) коррупциогенный факторым мумо.
Тидлан кӧра Марий Элым вуйлатыше Александр Евстифеев кугыжаныш орган ден верысе самоуправлений орган-влакын юридический службыштын пашаеҥыштлан туныктымо шот дене семинар ден тренингым эреак эртарен шогаш кӱштен. Тудо тыгак нормативно-правовой акт-влаклан да нунын проектыштлан антикоррупционный экспертизым эртарыме пашам эреак шинча ончылно кучаш шўден.
Марий Эл Республикым вуйлатышын организаций да аналитике виктемжын уверже негызеш П.ШАКИРОВ ямдылен
