Уш дене варашрак кодын вияҥше икшыве-влаклан палемдалтше Савин интернат-пӧртыштӧ 23 май гыч 1 июнь йотке Йочам аралыме тӱнямбал кечылан пӧлеклалтше акций лийын.
Тудо Марий Эл Республикын Социальный вияҥмаш министерствыжын тӱҥалтышыж почеш кок этап дене эртен: 23-28 майыште – республикысе районлаште илыше инвалид йоча ден нунын ача-аваштлан, 1 июньышто – социально-реабилитационный, реабилитационный рӱдер-влакын воспитанникыштлан.
Акций начарын тарванылше да коштын кертдыме йоча ден инвалид-влакым иппотерапий полшымо дене реабилитироватлымылан виктаралтын. Южо йочалан имне дене театрализоватлыме представленийым, интернат-пӧртыштӧ шинчымашым погышо-влакын выступленийыштым да иппотерапий занятийыштым ончыктымо. Тыгак икшыве-шамыч ипподромым ончен коштыныт, инструктор дене пырля имне ӱмбалне кудалыштыныт, чайым йӱыныт.
Мероприятийыште чылаже 32 инвалид йоча да начарын тарванылше але коштын кертдыме икшывым ончышо 60 наре еш участвоватленыт.
М.ИВАНОВА.