Республикыштына Пенсионер-влак коклаште компьютер многоборье дене X всероссийский чемпионтлан ямдылалташ тӱҥалыныт.
Марий Элын Социальный вияҥмаш министерствыжын палдарымыж гыч, чемпионатын регионысо этапше 30 июнь марте «Ӱшанлын пайдаланыше» да «Тӱҥалше пайдаланыше» номинацийла дене онлайн режимыште эрта.
Чемпионатыш 60 ияш да тылеч кугурак пӧръеҥ ден 55 ияш да тылеч кугурак ӱдырамаш-влакым участвоватлаш вучат.
«Тӱҥалше пайдаланыше» номинацийын ойырен налме туржо 19 июньышто лиеш, «Ӱшанлын пайдаланышын» — 26 июньышто.
Участник-шамычлан Яндекс кычалме системыште, Россий Пенсий фондын сайтыштыже пашам ыштыме, интернетыште лӱдыкшыдымылык шотышто заданий-влакым шуктыман. Ойырен налме турышто участвоватлашлан мӧҥгысӧ заданийым – Кугу Отечественный сарыште сеҥымылан 75 ий теммылан пӧлеклалтше «Кугу Сеҥымашын еш историйже-влак» презентацийым – ончыктыман.
Ойырен налме турым иктешлыме почеш сеҥышыш лекше кок еҥым Х Всероссийский чемпионатыште Марий Элын чапшым дистанционно аралаш палемдат.
Чемпионатыште участвоватлаш шонымо нерген йодмашым 17 июнь марте колтыман.
Мут толмашеш, ӱмаште Пенсионер-влак коклаште компьютер многоборье дене чемпионат гыч Марий Элын участникше-шамыч «шийым» конденыт.
М.ИВАНОВА
