Кугу Сеҥымашлан 75 ий темме вашеш Йошкар-Оласе ракетный дивизийын военнослужащийже-влак рӱдоланан ик паркшым сылнештарыше танкым шотыш конденыт.
Йошкар-Оласе Сеҥымаш паркым 14 ий сылнештарыше Т-55 танк уэш кудалышташ йӧршо. Тидын дене 9 майыште Марий Эл вуйлатыше Александр Евстифеевым III степенян Кутузов орденан Киевско-Житомирский 14-ше ракетный дивизийыште лиймыж годым палдареныт.
Танкым 2006 ийыште Пенза областьысе Сердобск олаште улшо вооруженийым да техникым аралыме базе гыч Йошкар-Олашке конденыт да постаментыш веранденыт. А тений тудын ходовой ужашыже-влакым тӧрлатеныт да парадный расчетын составышкыже пурташ лийыныт.
Ракетный дивизийын автомобильный службыжын начальникше капитан Динар Саматовын каласкалымыж почеш, тиде пашам Марий машиностроительный завод да Чонымаш механизаций управлений дене пырля шуктеныт.
Марий Эл вуйлатышын организаций да
аналитике виктемжын уверже негызеш Л.КАМАЛЕТДИНОВА ямдылен
