Апрельыште Марий кугыжаныш университетыште «Виват, Франций!» 13-шо региональный форум эртен. Тудым Марий Элысе образований да науко министерстве, Йошкар-Ола администраций округын образований управленийже, Андре Мальро лÿмеш 26-шо номеран гимназий, Марий кугыжаныш университет ямдыленыт. Мероприятий Йошкар-Оласе образовательный учреждений-влакын тӱрлӧ площадкылаштышт онлайн да оффлайн режимыште эртен.
Тиде мероприятий Марий Элын опорный вузшо да республикыште межкультурный компетенций направлений дене пашам ыштыше образовательный учреждений-влак коклаште сай кылым ышта. Кызытсе образований системыште тыгай йодыш пеш пӱсын шога. Глобализаций жапыште тудын кÿлешлыкше студент-влакын тÿнямбал академический мобильностышт дене кылдалтын.
Форум 200 чоло участникым чумырен. Латшым секцийын пашаштыже тÿрлö школласе туныктышо ден тунемше-влак, Марий кугыжаныш университетын преподавательже ден тӱрлӧ элла гыч шинчымашым погаш толшо студент-влак участвоватленыт. Форумын пашашкыже Татарстан Республик гычат участник-влак ушненыт. 180 еҥ доклад да презентаций дене выступатлен.
Форумын тӱҥ номинацийже-влак коклаште Поэзий салон (Salon poétique. Belles pages de la poésie), «Франций, Россий, Марий Эл: историй, сымыктыш, йӱла (Monde de multiples cultures) руш да француз йылме ден ямдылыме шанче да усталык проект конкурс, Франкофоний тӱня (Planète De La Francophonie), Шанче факт-влак салон (Atelier scientifique), сӱрет сымыктыш таҥасымаш (A l’atelier du peintre) лийыныт. Тыгак руш да йот йылме-влак дене возымо произведений негызеш ямдылыме сочинений конкурс, француз муро фестиваль эртаралтыныт. Сеҥыше ден лауреат-влак грамот дене палемдалтыныт.
Тыгай мероприятий тунемше-влаклан науко аланыште шке мастарлыкыштым ончыкташ сай йӧным ышта, а кӱшыл шинчымашым пуышо учрежденийлан школлаште профориентаций пашам шуктен шогаш полша.
Ф.Я. Хабибуллина, педагогике науко кандидат,
МарГУ-н доцентше,
И.Г. Иванова, филологий науко кандидат,
МарГУ-н доцентше.
