Кок тӱжем утла участник, витле эксперт, шымлу делегаций, нылшӱдӧ волонтёр, шымшӱдӧ уста выступлений да тӱжем, уке, миллион куанле шижмаш – чыла тиде XXVIII «Российысе студент шошо – сеҥымаш шошо» фестиваль.
Марий Элын чапшым 5-9 сентябрьыште Ростов-на-Дону олаште эртаралтше конкурсышто Марий кугыжаныш университет гыч 16 ӱдыр арален. Нуно эстраде муро да куштымаш, вокал–джаз да калык куштымаш направленийла дене усталыкыштым тергеныт.
«Сӱан деч вара мӧҥгӧ» маналтше марий куштымаш дене Шернур район Глазырин ялыште шочын-кушшо ӱдыр Татьяна Кудряшова кумшо степенян лауреатыш лектын. Ты номерым «Марий Эл» кугыжаныш ансамбльын художественный руководительже Славик Асмаев шынден.
«Студент шошо» мероприятийыште шуко оҥай каныме программе, усталык мастер-класс, кумдан палыме еҥ-влак дене вашлиймаш лийыныт. Кажне кастене хореографий да битбокс дене таҥасымаш-влакым эртареныт. Икманаш, канен шинчаш жап лийын огыл.
Икымше кечылаште организатор могырым паша начаррак каен. Ростов тынар шуко унам иканаште вашлияш ямде лийын огыл, очыни. Туге гынат, мылам тушто пеш келшен», — каласкалыш сеҥыше ӱдыр.
Меят Марий Эл делегацийым саламлена. Ӱдыр-влаклан сай лектышым тыланена.
О.МОШКИНА
