Ял ден селаласе, сад ден дачыласе пакчашке логалмеке, пытартыш жапыште, поснак кеҥежым, тӱрлӧ тӱсан, мотор, чоным куандарыше пеледыш тӱняш логалат.
Лач тидымак каласаш лиеш Волжский район Чодраялыште илыше Николаевмытын пакчашт нерген. Озавате Галина Михайловнан сылным йєратымыже вигак коеш. Палисадеш, кудывечеш, пакчаш ятыр тӱрлӧ сорт пеледышым шынден. Йошкар, канде, сирень тӱсан петунийже – пакчаштат, пӧртыштат, пырдыжыштат. Вес моло сортшым, оҥай узорым ыштен, клумбылашке шынден. Ты пеледыш ансамбльыште бархатцы, георгин, роза, лилий (пелед пытен), астра, циний, хризантем, гладиолус, флокс да молат улыт. Гераньжак – лу тӱрлӧ тӱсан. Ты пеледышыже кеҥежым клумбышто розамат пуйто алмашта, а телым пӧрткєргыш кусна.
Эх, а олмапушто олмаже!..
– Олма – моткоч пайдале. Верысе фруктын корольжо манашат келшен толеш. Тыглай кочкашат, пӱчкеден кошташат, вареньым, повидлым ышташат, компотым, сокым шолташат, когыль кєргыланат… келшен толеш, – ойла Галина Николаева. Тений моткоч шуко шочын. Вольыкланат пукшена. Кеҥежым от єркане гын, ялыште чылажымат шынден, ончен кушташ лиеш. Тыгодым жапшат лектеш веле. Арам огыл «Кеҥеж телым пукша» маныт калыкыште. Кечыгут юла модыш гай пєрдаш логалеш. Такшым чыла шкет шукташат лиеш, но теве ынде уныка-влакат куандарат: каныш жаплан, кеҥеж каникуллан толмекышт, сурт-сомылкам ышташ полшат, йыраҥлаште шӱкшудым сомылат… Жапше годым чылажымат ыштыме шуэш: ковыштамат тӱрлӧ сортым шынденна, кешырат, киярат шуыныт, помидорат кӱэш. Мый телылан кажне ийын шӱдӧ утла банке компотым ямдылена. Тылеч посна шинчалтыме, мариноватлыме кияр, помидор, поҥго… Тӱрлӧ салатымат ышташ ом ӧркане. Тунемалтын ынде. Адакшым уна-влак толмеке, шке ыштыме тутло кочкыш дене сийлаш шканемат куан.
Тидыжым ме командировко дене мийымеке, чылажымат шкеак ужынна. Мо оҥайже: Галина Михайловна тӱрлӧ «сорт» чайым шкеак ышта. Тидын нерген газетнан лишыл номерыштыже пален налын кертыда. Эше тудо моткоч сайын тӱрла. Тидланже школышто тунемше-влакымат кумылаҥда. Воспитанникше-шамыч дене пырля конкурслаштат, выставкылаштат мастарлыкыштым ончыктат, сеҥышыш лектыт.
Е.ЭШКИНИНА.
М.Скобелевын фотожо.
