Теҥгече кечывал деч вара Александр Евстифеев журналист-влаклан брифингым эртарыш.
— Сайлымашке республикыште 43,62 процент еҥ миен. Тиде – шагал огыл, а сай результат. Федеральный кӱкшытан дене таҥастарымаште региональный сайлымашыш еҥ-влак эре шагалрак толыт.
А.Евстифеев тудын верч, тудын программыж верч йӱкым пуышо-влаклан поснак таум каласыш.
— Сайлыше-влак мый дечем программем илышыш пуртымым вучат да тидлан ӱшанат. Мый ӱшаныштым сулаш шонем.
Вара тудын программыж верч огыл йӱклышӧ-влакланат таум ойлыш.
— Тауштем чолга илыш позицийыштлан, шке шонымашышт улмылан, тудым каласен кертмыштлан да моштымыштлан. Тыге нуно мылам программышкем пурталтде кодшо йодыш-влак улмо нерген ойлат.
Тыгак республикысе чыла политический вий ден мер организаций-влаклан тауштыш. Эн ончычак «Единая Россия» партийлан тудым темлымыжлан, сайлымаш фондым формироватлаш полшымыжлан каласыш. Поснак кугу таум КПРФ-ын республикысе отделенийжылан политический дипломатийым ончыктымыжлан – шке кандидатурыжым темлыдымыжлан да тудым поддержатлымыжлан — ойлыш. Общественный поддержке штабшыланат таум каласыш.
— Мый агитаций пашам эртарен омыл, молан манаш гын тудым шукташ отпускым налаш йӧнем лийын огыл. Тиде пашам пӱтынек штаб ыштен, — мане.
СМИ-н тыршымыжымат палемдыш.
— Сайлымаш дене кылдалтше пашам, молымат келгын ончыктымылан да почын пуымылан таум каласем. Пашан лектышыже – вуйшиймаш йӧршын гаяк уке. Пурышо кок вуйшиймаш гыч иктыжым мӧҥгеш налыныт, весыж шотышто мерым моткоч писын приниматленыт. Тыге мемнан дене иктаж-мо дене келшыдыме сайлыше уке. Республикысе ЦИК сайлымаш эртыме нерген ик эн ончыч отчетым ыштен. Тудын пашам кузе шуктымыж шотышто ик ӧпке мутат уке.
Ойжым А.Евстифеев тыге мучашлыш:
— Умбакыже пашам пырля ышташ тӱҥалына. Шымше апрельыште мыйым республиклан палдарыме годым мом каласенам, кызытат тудымак ойлем: чылаштымат илышым саемдышаш верч тыршаш ӱжам. Мемнам сеҥымаш вучымо шотышто нимыняр ом кокытелане.
Любовь Камалетдинова.