Самырык-влак дене пашам ыштыше айдеме тудо чонжо денак самырык, очыни. Тидыже «Арслан» лаштыкын тачысе унаже Денис Игнаев дене мутланымаштат шижалте. Тудо ынде ятыр ий студент-влак дене пашам ышта, Юл кундем технологический университетын «Политехник» спорт да тазалыкым пеҥгыдемдыме, каныме базыжын директоржо. Шошым, кеҥежым гын тудо эре Яльчик ер серыште, кана огыл, пашам ышта. Базе лач тушто верланен. А шыжым да телым базым каныме жаплан ямдылыме пашам шукташыже логалеш. Эшежым тудым самырык ача манаш лиеш: шукерте огыл тудын пелашыже ӱдыр азам пӧлеклен. Тиде куан уверымат мемнан деч ыш шылте. Денис Демьянович Пошкырт кундемыште шочын-кушкын. Пӱрымаш тыге савыралын: кызыт тудо ешыж дене Йошкар-Олаште ила.
— Денис Демьянович, шке жапыштыже Тендам Марий Элыш толаш мо кумылаҥден?
— Мый Мишкан район Ардаш ялыште шочын-кушкынам. Туштак школым тунем пытаренам. Кандаш класс деч вара Белебей олаште Ял озанлык механизаций да электрофикаций техникумым тунем лектынам. Ачам-авам туныктышо лийыныт, кочам — тале водитель, механик. Кочам финн, Кугу Отечественный сарым эртен, но увер деч посна йомын. Мыят изинек техникылан шӱман кушкынам. Колхоз гычак направленийым пуэнытат, сандене варажым мастерской вуйлатышылан ышташ тӱҥалынам. Армийыш миен толмеке, угыч колхозыш пӧртылынам. Кӱшыл шинчымашым налаш манын, Уфаш тунемаш каяш шоненам. Но йолташем Марий политехнический институтыш тунемаш пураш каяш лийын. Тудын дене пырля мыят тышке тольым. Йолташем пурен ыш керт, а мый механический факультетын студентше лийым. Тунемме годым комсомол организаций секретарят лийынам, спорт денат кылым кученам.
— Икманаш, чолга студент лийында?
— Комсомол горком членлан, горсовет депутатлан сайленыт ыле. Институтым тунем пытарымеке, «Маригражданстрой» организацийыште пӧртым монолит дене чоҥышо инженерлан кум ий ыштенам. Лач тудо пагытыштак элыште ГКЧП деч варасе умылыдмаш тӱҥале… Тунам мыйым Музыкальный школ-интернатыш директорын алмаштышыжлан пашашке ӱжыч. Ныл ий гыч образований министр Римма Катаева министерствыш чоҥымо паша шотышто советниклан ӱжо. Неле жап лийын. Окса шотышто эре чӱдылык лектеден. А вара республикын президентше вашталте. Политехнический институтын каныме базе директоржо мыйым алмаштышыжлан ӱжо. Чыла шонкален-вискален ончышым да келшышым.
Кумданрак — «Марий Эл» газетын
2017 ий 18 ноябрьыште лекше номерыштыже лудын кертыда
Светлана Носова мутланен.
