Москваште «Идалыкын ешыже» всероссийский конкурсым иктешленыт. Тудо визымше гана лийын да «Моя семья – моя Россия» девиз дене эртен.
«Идалыкын ешыже» всероссийский конкурсын федеральный этапышкыже ушнаш элнан 83 регионжо гыч 342 йодмаш пурен. Нунын кокла гыч Марий Эл гыч кок еш кок номинацийыште сеҥышыш лектын.
«Ялысе еш» номинацийыште Шернур район Шокшем ял гыч Иван Алексеевич ден Светлана Михайловна Малининмытын ешышт ойыртемалтын. Тиде еш ынде 27 ий ваш келшен, икте-весым пагален ила. Вате-марийын Элина, Надежда ӱдырышт, Даниил эргышт кушкыт. Малининмыт моло-влаклан, поснак самырык-шамычлан сай пример улыт, вет нуно кеч-могай пашашкат кумылын ушнат. Мутлан, шочмо ялыштым тӱзатымаште ик эн чолган тыршат.
«Еш – йӱлам аралыше» номинацийыште Волжский район гыч Алексей Леонидович ден Екатерина Арсентьевна Кудрявцевмытын ешыштым палемденыт. Вате-марий вич шочшым: ныл эргым да ик ӱдырым – ончен куштат. Нуным ача-авашт изиж годсекак шке калык йӱлам да тӱвырам палаш, пагалаш да аклаш туныктат.
Кудрявцевмыт путешествийыш чӱчкыдынак коштыт. Утларакше шке марий кундемысе шнуй да ойыртемалтше верлаште лияш йӧратат. Тыгак элнан тӱрлӧ тоштерышкыже, черкышкыже, монастырьышкыже миен толыныт.
Тиде еш мер пашаштат тырша. Вате-марий ял пайремым, субботникым эртарат, шочмо ялыштым тӱзатымаштат чолгалыкым ончыктат. Сандене Кудрявцевмытым шке велнышт веле огыл, районыштыштат сайын палат да пагалат.
Конкурсышто сеҥыше-влакым Москваште шыже мучаште саламлаш тӱҥалыт. А кызыт тудын иктешлымашыж почеш Национальный книга-летописьым савыкташ ямдылалтыт. Икымше книгаште сеҥышыш лекше еш-влак нерген каласкалалташ тӱҥалеш, а кокымшыштыжо Всероссийский конкурсын чыла участникше дене палдарат.
Л.КАМАЛЕТДИНОВА
