Марий Элым вуйлатыше Юрий Зайцев республик правительствын еҥже-влак дене эртарыме заседанийыште тазалыкым пеҥгыдемдыме кеҥежымсе кампаний, пасу паша, илалше да инвалид-влакым кужу жап ончымо системе дене кылдалтше йодышым каҥашен.
Образований да науко министр Лариса Ревуцкаян увертарымыж почеш, кызытлан школ пеленысе 175 лагерьыште чумыр налмаште 12265 икшыве кана, а ола деч ӧрдыжсыштӧ – 335. Таче тыгай организацийже мемнан кундемыште 201 уло, нуно чыланат икшыве-влакын каныме жапыштышт пашам ышташ палемденыт. 2023 ийыште йоча-шамычын тазалыкыштым пеҥгыдемдаш да канаш йӧным ышташ 217 миллион утла теҥге ойыралтеш.
«Марий Элым вуйлатышын пунчалже почеш, тений «Чодыра йомак» эмлыме да тазалыкым пенгыдемдыме комплекс уэш шке омсажым почын. Тыге эше 987 икшывылан канаш йӧным ыштыме», – ешарен Лариса Ревуцкая.
Юрий Зайцев палемден: тазалыкым пеҥгыдемдыме кеҥежымсе кампаний жапыште лагерьлаште лийше ӱдыр-рвезе-влакын илышыштлан каныш лӱдыкшӧ лийшаш огыл, сандене тидлан кугу тӱткышым ойырыман. Тыгак тудо Запорожье областьын подшефный районжо гыч икшыве-влаклан мемнан кундемыште тазалыкым пенгыдемдаш йӧным ышташ кӱлмӧ нерген ойлен.
Ялозанлык да кочкыш сату министр Андрей Кондратенко пасу пашан кузе эртымыж дене палдарен. Тудын палемдымыж почеш, тений шошо ага сомылым озанлык-шамыч, ӱмашсе дене таҥастарымаште 20 кечылан ончыч тӱҥалыныт. Нунылан кугыжаныш полышым жапыштыже пуымо шотышто Россий Федераций Ялозанлык министерствын да Марий Эл вуйлатышын шындыме задачым шуктымо. Кызытлан республикысе агропромышленный комплексын предприятийже-влаклан чумыр налмаште 774 миллион теҥге кугытан полыш пуалтын.
«Тений икымше гана ялозанлык техникым налме роскотым петыраш республикын бюджетше гыч окса ойыралташ тӱҥалеш. Субсидийым сентябрь-октябрьыште пуаш палемдыме. Тидлан тыланда, Юрий Викторович, тау», – каласен Андрей Кондратенко.
Паша да социальный аралымаш министр Марина Островская илалше ден инвалид-влакым кужу жап ончымо системым илышыш пуртымо нерген каласкален. Тудын увертарымыж почеш, тиде пилотный проект Российын вич регионыштыжо шыҥдаралтеш, нунын радамыш Марий Эл пура. Республикыште ты шотышто чыла муниципальный районым авалтыме. Проект дене келшышын, мероприятийлам эртараш тений 754 миллион наре теҥгем ойырымо, тышеч федеральный бюджет гыч – 718 миллион теҥгем.
Марий Элым вуйлатыше калыклан медицине да социальный услугым пуымо шотышто пашам умбакыже уэмден вияҥдаш кӱлмӧ нерген палемден.
Марий Эл Республикын вуйлатышын администрацийжын информаций паша пӧлкажын уверже негызеш Г.Кожевникова ямдылен.
